Shu kunlarda parlament a’zolari hududlarda bo‘lib, odamlarning turmushi, yashash sharoiti, ehtiyojini atroflicha o‘rganayapti, deb yozadi “Xalq so‘zi” gazetasi.
Chunonchi, xalq vakillarining Namangan viloyati Mingbuloq tumani aholisi bilan muloqotining dastlabki kunlarida 426 ta xonadondagi ahvol o‘rganilib, 300 dan ortiq muammoli masalalar o‘rtaga tashlandi. Mahallalar infratuzilmasidagi kamchiliklarni bartaraf etish, oilaviy biznesni moliyaviy qo‘llab-quvvatlash, ta’lim, sog‘liqni saqlash muassasalari va boshqa sohalar faoliyati bilan bog‘liq masalalarning 132 tasi mahalliy boshqaruv idoralari hamda tegishli mutasaddilar ishtirokida hal qilindi. 112 ta muammo tuman hokimligi tomonidan ijro uchun tegishli tashkilot va muassasalarga yuborildi. Respublika darajasida hal etiladigan 34 ta masala deputatlar tomonidan qat’iy ro‘yxatga olindi.
Ta’kidlanishicha, deputat va senatorlarning qishloq mahallalaridagi xonadonlarga tashrifi chog‘ida odamlar ko‘proq bandlik masalasini o‘rtaga qo‘yishayapti. To‘g‘ri, tumanda bu ishni tomorqa imkoniyatlaridan samarali foydalanish orqali yo‘lga qo‘yishning imkoniyatlari mavjud. Biroq yer uchastkalari meliorativ holatining yomonligi dehqonchilik va bog‘dorchilik mahsulotlari hosildorligining o‘ta darajada past bo‘lishiga olib kelmoqda.
— Masalan, 11 mingdan ortiq fuqarolar istiqomat qilayotgan Mehnatobod, Uyurchi Damko‘l va Qo‘g‘aliko‘l mahallalaridagi 1,5 mingdan ortiq oilalar mazkur masalada uzoq yillardan buyon aziyat chekib kelayotgan ekan, — deydi Oliy Majlis Qonunchilik palatasi deputati Shuhrat To‘xtaboyev. — Gap shundaki, bu hududlarda yer osti suvi yuzaga ko‘tarilib, ko‘p yillik mevali daraxtlar o‘tinga aylanayapti. Bu yerda sizot suvlarni tortib olishga mo‘ljallangan nasos bor. Ammo o‘tgan asrning oltmishinchi yillarida o‘rnatilgan agregat qariyb 20 yildan buyon ishlamaydi. Aholi bu masalada tegishli idoralarga murojaat qilib charchagan va oxir-oqibatda muammo yechilishidan umidini uzgan. Biz hududdagi ahvolni o‘rganayotgan chog‘da odamlar masalani qat’iy qo‘yishdi. Shundan kelib chiqib, nasosni yangilash yuzasidan respublika Qishloq va suv xo‘jaligi vazirligiga deputat so‘rovi bilan chiqamiz.
Joylardagi sog‘liqni saqlash muassasalari faoliyati, aholining ulardan foydalanish darajasini o‘rganish jarayonida qishloq oilaviy poliklinikalari hamda vrachlik punktlarida mutaxassislar yetishmasligi, patronaj hamshiralarining xonadonlarga tashrifi muntazam emasligi, ayrim joylarda qabul va muolaja xonalaridagi sharoit talabga javob bermasligi ko‘zga tashlandi. Tumandagi dorixonalarda narxi cheklangan dorilar sotuvi yetarlicha yo‘lga qo‘yilmagan. Misol uchun, Jomasho‘y shaharchasidagi faoliyati ko‘zdan kechirilgan 8 ta shoxobchaning birortasida qonni suyultiruvchi geparin preparati topilmadi.
Parlament a’zolarining Sirdaryo viloyati Oqoltin tumani fuqarolari bilan bu galgi uchrashuvlari yanada samarali kechmoqda. Boisi, endilikda Senat a’zolari va Qonunchilik palatasi deputatlari ishni sektorlar bo‘yicha olib borishayotir. Bu, albatta, barcha hududni qamrab olish, aholi bilan yanada ko‘proq muloqot qilish imkonini kengaytirmoqda. Shu bilan birga, “yo‘l xaritasi”da belgilangan vazifalarning bajarilishi atroflicha ko‘rib chiqilayotir.
O‘rganishlar davomida ko‘plab oila va fuqarolarning mushkuli oson bo‘layotgani e’tiborga molik. Masalan, Obod mahallasida istiqomat qiluvchi Qahramon Yo‘lchiyev doimiy ish joyiga ega bo‘ldi. Endi u “Oqoltin agro kapital” fermer xo‘jaligining xodimi. Shuningdek, tikuvchilik yo‘nalishida faoliyat yuritayotgan Zebo Madaminova va zardo‘zlik bilan shug‘ullanayotgan Muhayyo Mamarasulovaning tadbirkorlik faoliyatini rivojlantirishga oid murojaatlari ijobiy hal etildi.
Parlament a’zolari ta’lim muassasalaridagi sharoit va o‘quv-tarbiya ishlari bilan batafsil tanishmoqda. Xususan, tumandagi 11-umumiy o‘rta ta’lim maktabidagi 3 ta sinfda parta va stullar yetishmasligi, yagona isitish tizimi mavjud emasligi, kutubxona esa zarur adabiyotlar bilan yetarli darajada ta’minlanmagani ma’lum bo‘ldi. Eng achinarlisi, mazkur ta’lim muassasasida kimyo, fizika, jug‘rofiya, matematika, rus va ingliz tillari fanlari bo‘yicha o‘qituvchilar ham yetishmaydi. O‘z navbatida, ushbu kamchiliklarni bartaraf etish vazifasi tuman xalq ta’limi bo‘limi nazoratiga olindi. Ahillik mahallasidagi “Oltin kalitcha” maktabgacha ta’lim muassasasidagi kamchiliklar “yo‘l xaritasi”ga kiritilib, ayni chog‘da ularni bartaraf etish choralari ko‘rilmoqda.
Xalq vakillarining Toshkent viloyati Qibray tumani aholisi bilan bevosita muloqotlarida odamlarni tashvishga solayotgan masalalar, yechimini kutayotgan muammolar, tumanni kompleks ijtimoiy-iqtisodiy rivojlantirish bo‘yicha sektorlar rahbarlari faoliyati chuqur o‘rganilayotir. Bu jarayonda tuman Kengashi deputatlari yaqindan hamkorlik qilishayapti.
Tuman davlat soliq inspeksiyasi boshlig‘i Akmaljon Tillayev rahbarlik qilayotgan 4-sektor shtabi “Ko‘prikboshi” mahalla fuqarolar yig‘ini binosida joylashgan, bu yerda ishlash uchun barcha sharoit yaratilgan. O‘tgan davr mobaynida shtab a’zolarining harakatlari bilan sektorga biriktirilgan Baytqo‘rg‘on, Chinobod, Qipchoq hududlaridagi 15 ta mahalla fuqarolar yig‘inlari aholisining 622 ta muammosi o‘rganildi. Ularning 422 tasi joyida hal etildi, 187 ta masala hal etish uchun tuman, 6 ta masala esa viloyat hokimligiga yuborildi.
Lekin ayrim kamchiliklar mavjudki, bu hanuz odamlarni tashvishga solmoqda. Masalan, “Baytqo‘rg‘on” mahalla fuqarolar yig‘inidagi Gulzor ko‘chasida yashovchi Latofat Mirrahimovani olaylik. Bu ayol uch nafar farzandi bilan 2013-yildan buyon ijarada yashaydi. Uyli bo‘lish uning birdan-bir orzusi. Yoki Do‘stlik ko‘chasida istiqomat qiluvchi Ra’no Tuyaqova ish vaqtida yiqilib jarohatlangan, mustaqil yura olmaydi. Nogironlik nafaqasi so‘rab yozgan murojaati rad etilgan. Yetmish yoshga yaqinlashayotgan nurobodlik Nina Fidyashovaga esa qarilik nafaqasi berilmagan.
Bu kabi muammolarni deputat va senatorlar xonadonma-xonadon yurganlarida aniqlashdi. Ularni hal etish choralari ko‘rildi.
Aslida sektor ishini bundan-da faollashtirish mumkin. Bu ushbu faoliyatni nazorat qilish bo‘yicha jamoatchilik nazorati guruhi sa’y-harakatlariga bevosita bog‘liq. Hozircha sektor sa’y-harakatida guruhning ta’siri sezilmayapti. Sababi, guruh a’zolarining ayrimlari bu ishdan umuman bexabar. Shuningdek, ular orasida tuman Kengashi deputatlari ham bor. Ajablanarlisi, tarkibni sektor rahbarining o‘zi shakllantirgan. Holbuki, mazkur tarkib xalq deputatlari tuman Kengashining sessiya-sida muhokama etilib, tasdiqlanishi maqsadga muvofiq. Bu, o‘z navbatida, deputatlarning xabardorligi ta’minlanishi, mas’uliyati ortishiga xizmat qiladi.
— Xalq bilan muloqot chog‘ida joylardagi haqiqiy ahvolni o‘rganish, mavjud muammolarni bartaraf etishga ko‘maklashish bilan bir qatorda, qabul qilingan qonunlarning mazmun-mohiyati hamda ahamiyatini jamoatchilikka keng tushuntirmoqdamiz, — deydi Oliy Majlis Senati a’zosi Maqsuda Vorisova. — Bularning barchasi parlamentning nazorat-tahlil faoliyatida, xalq vakillarining aholi bilan muloqotlarini yanada samarali tashkil etishda, ochiqlik, oshkoralik, haqqoniylik prinsiplariga qat’iy amal qilishda ijobiy ta’sir ko‘rsatadi.
Parlament a’zolarining hududlarda aholi bilan muloqotlari davom etmoqda.
Izoh (0)