Boshqa mamlakatga sayohat qilmoqchi bo‘lgan oila Toshkent aeroportida pasport nazoratidan o‘tib, samolyotga o‘tirgan, ammo belgilangan mamlakatga yetib borgach, u yerdagi pasport nazorati oila farzandining pasportini qonuniy kuchga ega emas deb topgan. Bu haqda Facebook’dagi “Potrebitel.uz” sahifasi saytida aytiladi.
Har bitta pasportda chegarachilar maxsus uskunada ultrabinafsha nuri ostida ko‘rishi mumkin bo‘lgan alohida belgilar bor. Yuqorida tilga olingan bolaning pasportida esa sahifalar numeratsiyasi noto‘g‘ri ekanligi va gerb pasport koreshogiga surilib ketgani aniqlangan. Bu esa pasportni qonuniy kuchga ega bo‘lmagan holatga keltiradi.
Xo‘sh, bu holatda kim aybdor? Pasport stolimi? Odamlarni yaroqsiz pasport bilan boshqa mamlakatga qo‘yib yuborgan Toshkent aeroportidagi pasport nazoratimi? Chiptalarga 10 million so‘m sarflangan. Vaqt va asablar sarflangan. Rejalar buzilgan. Oila shunchaki samolyotda u yoqdan bu yoqqa borib kelgan.
Facebook’dagi guruhda shu masala muhokama qilinayotgan paytda onalardan yana biri o‘z bolasining kinder-pasportini maxsus ultrabinafshali chiroqda tekshirib ko‘rib, unda ham sahifalar numeratsiyasi muvofiq emasligi, gerb esa koreshokka tushib qolganini aniqladi. Ma’lum bo‘lishicha, ikkala pasport seriyasi bir xil bo‘lgan. Demak yaroqsiz kinder-pasportlar ko‘plab oilalarga berilgan.
Professional huquqshunoslar bunday vaziyatda quyidagicha ish tutishni maslahat beradi:
- Ichki ishlar organlarining xorijga chiqish-kelish va fuqarolikni rasmiylashtirish (OVIR) hududiy va shahar bo‘linmasiga rasmiy shikoyatnoma (2 nusxada).
- Ichki ishlar vazirligiga shikoyatnoma (2 nusxada).
- Jismoniy va yuridik shaxslar murojaatlari to‘g‘risidagi qonunga muvofiq, 15 kun ichida javob beriladi.
- Shikoyatnomalarga mavjud hujjatlar nusxalari ilova qilinadi va albatta kontakt ma’lumotlari ko‘rsatiladi.
- Javob olingach, natijaga qarab, zararni qoplash haqidagi da’vo arizasi bilan fuqarolik sudiga murojaat qiling. Ushbu holatda javobgarlar uchta bo‘ladi — IIV (pasport ishlab chiqaruvchi), chegara xizmati, xorijga chiqish-kelish va fuqarolikni rasmiylashtirish bo‘linmasi (OVIR)
Izoh (0)