AQShning Viskonsin shtatida yashovchi Dennis Kovalski “yashash uchun ikkinchi imkoniyat”ga ega bo‘lish maqsadida o‘zini va o‘z oilasi a’zolarini suyuq azotda muzlatib qo‘yishga qaror qildi, deb yozadi “RIA Novosti”.
Kovalski o‘zi shartnoma tuzgan Krionika instituti prezidentidir. O‘limidan keyin uni, rafiqasi Mariyani va uch o‘g‘lini kriogen kamerada muzlatib qo‘yishlari uchun u jami 140 ming dollar to‘ladi. Paramedikning so‘zlariga ko‘ra, bu ularga “kelajakda yangilangan hayotda yashash uchun imkoniyat” beradi.
Vafotlaridan keyin Dennis va oilasi a’zolarining jasadlari muzlatiladi va Michigan shtatidagi Krionika institutiga keltiriladi. U yerda ularning qoni antifriz bilan almashtiriladi, jasadlar esa suyuq azotli kameralarga qo‘yiladi. Bunday jarayon narxi bir kishi uchun 28 ming dollarga teng.
Kovalskining so‘zlariga ko‘ra, bugungi kunda 2000 kishi muzlatib qo‘yilish uchun ro‘yxatdan o‘tgan, 160 ta jasad esa allaqachon kriogen kameralarga joylashtirilgan.
“Biz hammamiz hech narsa kafolatlanmaganligini tushunamiz… Ammo kelajakda bizni nimalar kutayotganini hech kim bilmaydi”, — deya xulosa qildi oila boshlig‘i.
Izoh (0)