Bitta universitetning ikki talabasi o‘zaro biologik aka-uka ekanligi ma’lum bo‘ldi, ular bir-birini uzoq yillar davomida qidirgan, deb xabar berdi Forum Daily.
Kiron Grem yoshligidan o‘zining biologik onasi va akasini qidirgan, shu sababli uning o‘gay onasi Kironga Ancestry’da (oila shajarasini tuzib, qarindoshlarini topishga mo‘ljallangan sayt) ro‘yxatdan o‘ta olishi uchun DNK-testlari to‘plamini bergan.
Uning biologik onasi Shoun Gant bo‘lib chiqdi, u uch oylik o‘g‘li Kironni boshqa oilaga topshirish borasida qiyin qarorni qabul qilishga majbur bo‘lgan. “Men unga o‘zi xohlagan narsasini bera olmasligimni his qilgandim”, — deya tan oladi ayol.
Kiron o‘z akasini Ancestry’ning ma’lumotlar bazasi orqali qidirishni boshlagan va uning genetik o‘xshashligi Vinsent ismli bolaniki bilan ko‘proq mos kelgan. Keyinroq, Vinsent Jorjiyadagi Kenneso universitetida o‘qishi ma‘lum bo‘lgan — aynan shu universitetda Kiron ham tahsil oladi. Hatto ularning mutaxassisligi ham bir xil.
Ular o‘zlarining qarindosh ekanligini bexabar bitta binoda o‘qigan.
Vinsent o‘z ukasining chaqaloqlikdagi holatini eslashini aytdi. “Men unga butilkacha orqali ovqat berganimni, tagliklarini almashtirganimni eslayman. Bularning barchasi bir lahzada miyamda gavdalandi, chunki bu Kiron haqidagi so‘nggi xotiralarim edi”, — dedi Vinsent.
Endilikda aka-uka ko‘proq vaqtini birga o‘tkazishni rejalashtirmoqda.
Izoh (0)