Iyul oyida O‘zbekiston bo‘yicha eng yuqori yillik inflyatsiya Farg‘ona viloyatida kuzatildi. Shu bilan birga, qator hududlarda o‘rtachadan yuqori narxlar o‘sishi qayd etildi.
Statistika qo‘mitasi joriy yil iyuldagi isteʼmol narxlari indeksini (inflyatsiya) eʼlon qildi.
Tahlilga ko‘ra, o‘tgan oyda tovar va xizmatlar narxlarida 0,2 foizlik deflyatsiya kuzatilgan. Yillik inflyatsiya darajasi esa 8,9 foizni tashkil etgan. Taqqoslash uchun, ko‘rsatkich iyun oyida 8,7 foiz edi.
O‘tgan oyda isteʼmol tovarlari narxining yuqori o‘sishi Buxoro, Navoiy, Namangan, Samarqand, Sirdaryo va Toshkent viloyatlarida kuzatilgan.
Qator hududlarda o‘rtacha 8,9 foizdan yuqori bo‘lgan inflyatsiya darajalari qayd etildi. Jumladan, Farg‘ona viloyatida 9,9 foizlik — eng baland inflyatsiya kuzatilgan. Shu bilan birga, quyidagi hududlarda o‘rtachadan yuqori ko‘rsatkich aniqlandi:
- Navoiy viloyati — 9 foiz;
- Xorazm viloyati — 9 foiz;
- Surxondaryo viloyati — 9,1 foiz;
- Sirdaryo viloyati — 9,5 foiz.
Mamlakatda iyul oyi davomida oziq-ovqat mahsulotlari 1 foiz arzonlashgan. Nooziq-ovqat mahsulotlari esa 0,2 foiz, xizmatlar 0,9 foiz qimmatlashgan.
Bir oyda narxlarning tushishi asosan meva va sabzavot mahsulotlarida kuzatildi. Masalan, meva va yong‘oqlar guruhidagi narxlar 9,1 foizga, sabzavotlar, ildizmevalilar va dukkakli mahsulotlarda 4,8 foizga tushgan.
Bir oy ichida sog‘liqni saqlash xizmatlari 0,2 foiz, transport 0,5 foiz, axborot va aloqa 0,2 foiz qimmatlashgan. Taʼlim sohasidagi xizmatlar narxi 0,1 foiz, restoran va mehmonxonalar 0,5 foiz oshgan.
Iyul oyida narxlari yuqori darajada o‘sgan tovar va xizmatlar ro‘yxatini bodring (46 foiz), karam (11,1 foiz), sovuq suv va kanalizatsiya xizmati (9,3 foiz) boshqargan. Shuningdek, propan 6,6 foizga, chiqindi to‘lovi 5,6 foizga, ekspluatatsiya xizmatlari 2,6 foizga, go‘sht 2,2 foizgacha qimmatlashgan.
Deflyatsiya qayd etilgan iyul oyida benzin narxi 0,6 foizga, dorilar 0,4 foizga oshgan.
Markaziy bank o‘tkazgan so‘rovda aholining yillik inflyatsion kutilmalari 13,2 foizga teng bo‘lgandi. Tadbirkorlik subyektlari esa kelgusi 12 oyda inflyatsiya darajasi 11,8 foizni tashkil etishini kutayotganini bildirgan.
Izoh (0)