Toshkentning “Paxtakor” klubi bosh murabbiyi Shota Arveladze 2017-yilgi mavsum yakunlariga ko‘ra, o‘zbek futboli rivojiga hissa qo‘shayotgan eng yaxshi xorijiy mutaxassis nominatsiyasida g‘olib chiqdi.
Marat Bikmayev O‘zbekistonda yil futbolchisi, Ro‘ziqul Berdiyev esa yil murabbiyi deb topildi
Biroq Arveladze O‘FFning yil yakunlariga bag‘ishlangan marosimiga tashrif buyura olmadi. Unga tegishli sovrinni “Paxtakor” klubi direktori Dmitriy Adisman qabul qilib oldi.
Gruziyalik Shota Arveladze “Paxtakor”ni mavsum o‘rtalarida qabul qilib olgandi. Uning boshqaruvida Toshkent klubi mavsumni kuchli uchlikda yakunladi va “Lokomotiv”ning yordami bilan Osiyo Chempionlar Ligasiga yo‘l oldi.
Aynan shu masalada “Paxtakor”ga yordam bergan “Lokomotiv” bosh murabbiyi Mirko Yelichich eng yaxshi xorijiy murabbiy nominatsiyada g‘olib chiqa olmadi. Uning boshqaruvida “temiryo‘lchilar” ketma-ket ikki bor “Oltin dubl”ni nishonlab, ham mamlakat chempionligini, ham O‘zbekiston Kubogini hech kimga bermagandi.
Biroq Mirko Yelichichda Oliy Liga klubini boshqarish uchun talab etiladigan litsenziya mavjud emas. Shu boisdan “Lokomotiv”ning de yure bosh murabbiyi sifatida Andrey Miklyayev faoliyat olib boradi.
O‘FF tashkil qilgan marosimda mavsumning eng yaxshi yosh futbolchisi ham aniqlandi. Mazkur nominatsiyada ham “Paxtakor” vakiliga omad kulib boqdi. Unga ko‘ra, Igor Chikrizov 2017-yilning O‘zbekistondagi eng yaxshi yosh futbolchisi sifatida tan olindi.
Eng yaxshi yosh futbolchiga sovrinni O‘FF bosh kotibi Sardor Rahmatullayev, Arveladzening sovrinini esa Sport Qo‘mitasi raisi Rustam Qurbonov topshirdi.
Izoh (0)