Rossiyaning Shimoliy Kavkaz okrug harbiy sudi terrorist Shomil Basayev to‘dasi tarkibida 1995-yili Budyonnovsk shahrida odamlarni garov olishda qatnashgan ikki shaxsni ozodlikdan mahrum etish haqida hukm chiqardi. Bu haqda “RIA Novosti” xabar bermoqda.
Xabar berishlaricha, Ramazon Bilolov 15 yilga, Magomed Mazdayev esa 13 yilga ozodlikdan mahrum etilgan. Bundan tashqari, Bilolov jabrlanuvchilarning qarindoshlariga yetkazilgan ma’naviy zarar uchun 300 ming rubl to‘lab berishi kerak.
Ramazon Bilolov va Magomed Mazdayevga “Terrorchilik harakati”, “Banditizm”, “Odamlarni garovga olish”, “Narkotik moddalarni noqonuniy saqlash” moddalari bo‘yicha ayblov e’lon qilingan edi. Biroq ularga faqat terrorchilik harakati moddasi bo‘yicha hukm chiqarilgan, qolgan ayblovlar, muddati o‘tib ketgani bois, olib tashlangan.
Tergov ma’lumotlariga ko‘ra, Bilolov va Mazdayev Stavropol o‘lkasidagi Budyonnovsk shahriga 1995-yil 14-iyun kuni Basayev va Abu Movsayev rahnamoligidagi jangarilar bo‘linmalari tarkibida hujum qilgan. Terrorchilar 1,6 mingdan ziyod aholini garovga olib, ularning barini mahalliy kasalxonaga haydab olib kirgan. Jinoyatchilar o‘shanda Chechenistondagi harbiy harakatlarni zudlik bilan to‘xtatish hamda Rossiya federal qo‘shinlarini Checheniston hududidan olib chiqishni talab qilgan.
17-iyun tongida Rossiya maxsus xizmatlari kasalxonani shturm bilan egallashga urinib ko‘rgan. Jang taxminan to‘rt soat davom etgan, har ikkki tomon ko‘plab yo‘qotishlarga uchragan. Terakt oqibatida 129 kishi, xususan, 9 bola halok bo‘lgan, 400 dan ziyod kishi tan jarohati olgan.
Izoh (0)