Россиянинг Шимолий Кавказ округ ҳарбий суди террорист Шомил Басаев тўдаси таркибида 1995 йили Будённовск шаҳрида одамларни гаров олишда қатнашган икки шахсни озодликдан маҳрум этиш ҳақида ҳукм чиқарди. Бу ҳақда «РИА Новости» хабар бермоқда.
Хабар беришларича, Рамазон Билолов 15 йилга, Магомед Маздаев эса 13 йилга озодликдан маҳрум этилган. Бундан ташқари, Билолов жабрланувчиларнинг қариндошларига етказилган маънавий зарар учун 300 минг рубль тўлаб бериши керак.
Рамазон Билолов ва Магомед Маздаевга «Террорчилик ҳаракати», «Бандитизм», «Одамларни гаровга олиш», «Наркотик моддаларни ноқонуний сақлаш» моддалари бўйича айблов эълон қилинган эди. Бироқ уларга фақат террорчилик ҳаракати моддаси бўйича ҳукм чиқарилган, қолган айбловлар, муддати ўтиб кетгани боис, олиб ташланган.
Тергов маълумотларига кўра, Билолов ва Маздаев Ставропол ўлкасидаги Будённовск шаҳрига 1995 йил 14 июнь куни Басаев ва Абу Мовсаев раҳнамолигидаги жангарилар бўлинмалари таркибида ҳужум қилган. Террорчилар 1,6 мингдан зиёд аҳолини гаровга олиб, уларнинг барини маҳаллий касалхонага ҳайдаб олиб кирган. Жиноятчилар ўшанда Чеченистондаги ҳарбий ҳаракатларни зудлик билан тўхтатиш ҳамда Россия федерал қўшинларини Чеченистон ҳудудидан олиб чиқишни талаб қилган.
17 июнь тонгида Россия махсус хизматлари касалхонани штурм билан эгаллашга уриниб кўрган. Жанг тахминан тўрт соат давом этган, ҳар иккки томон кўплаб йўқотишларга учраган. Теракт оқибатида 129 киши, хусусан, 9 бола ҳалок бўлган, 400 дан зиёд киши тан жароҳати олган.
Изоҳ (0)