5–6-dekabr kunlari Toshkentda tiklanuvchi energiya manbalari (TEM) sohasida ishlab chiqiluvchi siyosatga bag‘ishlangan seminar bo‘lib o‘tdi. Bu haqda Jahon bankining O‘zbekistondagi vakolatxonasi xabar bermoqda.
Seminar O‘zbekiston hukumati va Jahon banki guruhi bilan birgalikda, Tiklanuvchi energiya manbalari xalqaro agentligi (IRENA) bilan hamkorlikda tashkil etilgan. Tadbirda vazirliklar va davlat idoralari, energetika kompaniyalari, ekspertlik va akademik doiralarning 80 ga yaqin vakillari ishtirok etdi.
2000—2015-yillarda O‘zbekistonda elektr energiyasi iste’moli 46,8 milliard kilovatt-soatdan 57,5 milliard kilovatt soatgacha o‘sgan. Baholashlarga ko‘ra, 2020-yilga borib mamlakat 25 foizga ko‘proq yoki 71,8 milliard kilovatt-soat elektr energiyasi iste’mol qiladi.
Mamlakat elektrostansiyalarining joriy holatda o‘rnatilgan quvvati 12 994 MVtga (megavatt) teng, jumladan “O‘zbekenergo” DAKning 29 ta issiqlik va gidroelektrstansiyalarining o‘rnatilgan quvvati 12 514 MVtni tashkil etmoqda.
Shu bilan birga, O‘zbekistondagi quyosh, shamol va gidroenergetikaning taqribiy salohiyati mos ravishda yiliga o‘rnatilgan quvvat miqdorida 530 milliard kilovatt-soat, 520 milliard kilovatt-soat va 1800 milliard kilovatt-soatga teng. Jahon banki guruhi tiklanuvchi energiya manbalari sohasida ishlab chiqayotgan siyosati va mamlakat iqtisodiyoti o‘sishida muhim omil bo‘luvchi ushbu sohaga jalb qilinayotgan investitsiyalar uchun O‘zbekiston hukumatini qo‘llab-quvvatlaydi.
Izoh (0)