5–6 декабрь кунлари Тошкентда тикланувчи энергия манбалари (ТЭМ) соҳасида ишлаб чиқилувчи сиёсатга бағишланган семинар бўлиб ўтди. Бу ҳақда Жаҳон банкининг Ўзбекистондаги ваколатхонаси хабар бермоқда.
Семинар Ўзбекистон ҳукумати ва Жаҳон банки гуруҳи билан биргаликда, Тикланувчи энергия манбалари халқаро агентлиги (IRENА) билан ҳамкорликда ташкил этилган. Тадбирда вазирликлар ва давлат идоралари, энергетика компаниялари, экспертлик ва академик доираларнинг 80 га яқин вакиллари иштирок этди.
2000—2015 йилларда Ўзбекистонда электр энергияси истеъмоли 46,8 миллиард киловатт-соатдан 57,5 миллиард киловатт соатгача ўсган. Баҳолашларга кўра, 2020 йилга бориб мамлакат 25 фоизга кўпроқ ёки 71,8 миллиард киловатт-соат электр энергияси истеъмол қилади.
Мамлакат электростанцияларининг жорий ҳолатда ўрнатилган қуввати 12 994 МВтга (мегаватт) тенг, жумладан «Ўзбекэнерго» ДАКнинг 29 та иссиқлик ва гидроэлектрстанцияларининг ўрнатилган қуввати 12 514 МВтни ташкил этмоқда.
Шу билан бирга, Ўзбекистондаги қуёш, шамол ва гидроэнергетиканинг тақрибий салоҳияти мос равишда йилига ўрнатилган қувват миқдорида 530 миллиард киловатт-соат, 520 миллиард киловатт-соат ва 1800 миллиард киловатт-соатга тенг. Жаҳон банки гуруҳи тикланувчи энергия манбалари соҳасида ишлаб чиқаётган сиёсати ва мамлакат иқтисодиёти ўсишида муҳим омил бўлувчи ушбу соҳага жалб қилинаётган инвестициялар учун Ўзбекистон ҳукуматини қўллаб-қувватлайди.
Изоҳ (0)