Pentagon genetik qurolni ishlab chiqishni boshladi

Amerikalik harbiylar bezgak tarqatuvchi chivinlarni yo‘q qilish imkonini beruvchi genetik texnologiyaga yuz million dollar investitsiya kiritdi. BMT ekspertlari ushbu texnologiya qurol sifatida qo‘llanilishidan xavfsiramoqda, deb yozadi The Guardian.

Yangi texnologiya nafaqat hasharotlarni, balki sut emizuvchilarni, xususan, kemiruvchilarni yo‘q qilishga qodir bo‘lishi kutilmoqda. Loyihani moliyalashtirish AQSh mudofaa vazirligi istiqbolli tadqiqotchilik loyihalari agentligi tomonidan amalga oshirilmoqda.

Nashr so‘rov o‘tkazgan ekspertlar, shu jumladan, BMT vakillari harbiylarga tobe bo‘lgan tadqiqotchilar o‘z loyihalarini grant beruvchilarning tor maqsadlariga muvofiq qayta yo‘naltirishi mumkinligidan xavfsiramoqda.

Avvalroq amerikalik harbiylar genetik o‘zgartirilgan organizmlardan “keyingi avlod razvedkasi sifatida” foydalanishni rejalashtirgan edi.