Kriptovalyutaga investitsiya kiritib, boyib ketgan dunyodagi ilk milliarderlar egizak aka-ukalar Kemeron va Teylor Uinklvosslar bo‘ldi. “TASS” aka-ukaning qanday qilib bu darajaga erishgani va ularning Facebook ijtimoiy tarmog‘i bilan aloqasi haqida hikoya qildi.
Dunyo matbuoti aka-uka Uinklvosslar haqida anchadan buyon yozmay qo‘ygan edi. Biroq The Sunday Telegraph ularning 2013-yilda bitkoinga 11 million dollar investitsiya qilib, 2017-yilda milliarderga aylangani haqida maqola e’lon qilganidan so‘ng ularning familiyasi og‘izga tushdi.
2004-yilda ular Facebook asoschisi Mark Sukerbergni sudga bergan. Uinklvosslarning fikricha, Facebook tarmog‘i ularga tegishli ConnectU sayti g‘oyasining o‘g‘irlanishi natijasida yaratilgan. Bu sayt Garvard va AQShning boshqa universitetlari talabalari uchun yopiq ijtimoiy tarmoq sifatida taqdim etilgan. Aka-uka sayt ustidagi ishni 2002-yilda kursdoshi Diva Narendra bilan boshlagan.
2003-yilda aka-uka Sukerbergni ishga yollagan va unga HarvardConnection’ning (ConnectU’ning birinchi nomi) dastur kodini bergan. Shundan so‘ng Sukerberg Uinklvosslar va Narendra bilan aloqaga chiqmay qo‘ygan va Facebook’ni yaratish ustida ishlay boshlagan.
Sukerberg bilan sud ishi boshlanganidan to‘rt yil o‘tgach, tinchlik kelishuvi doirasida aka-uka 65 million dollar olgan. Bu pullarning bir qismini ular bitkoinlar sotib olishga sarflagan va 2017-yilda milliarderga aylandi.
Bitkoin qanday qilib bu darajaga keldi?
Dunyodagi birinchi bitkoin o‘tkazmasi 2009-yilning yanvar oyida amalga oshirilgan. Shu vaqtda 50 ta kriptovalyuta muomalaga chiqarilgan. Bir yildan so‘ng amerikalik Laslo Xanech uyiga pitssa buyurtirgan va uning uchun 10 ming bitkoin to‘lagan. Bu Satoshi Nakamotoning kriptovalyutasidagi birinchi xarid bo‘lgan. O‘shanda bitta kriptovalyutani bir sentdan arzonroqqa sotib olish mumkin edi.
2013-yilda Uinklvosslar bitkoin sotib olgan vaqtda bitta valyutaning kursi 100 dollardan ortiq edi. Ular 100 mingta bitkoin sotib olgan. O‘sha vaqtda aka-uka dunyodagi har yuzta bitkoinning bittasiga egalik qilgan.
To‘rt yil ichida kriptovalyutaning kursi 100 baravar oshdi. 2017-yilning 4-dekabr holatiga bitkoin kursi 11 ming dollardan ortiqni tashkil qildi.
Olimpiada va kinematograf
Maktabda o‘qish vaqtida, keyinchalik universitetda aka-uka Uinklvosslar faol ravishda akademik eshkak eshish bilan shug‘ullangan. 2008-yilda ular Pekinda bo‘lib o‘tgan Olimpiada o‘yinlarida ishtirok etgan va hatto finalga chiqqan, biroq unda oxirgi o‘rinni egallagan.
2010-yilda esa rejissor Devid Fincherning “Ijtimoiy tarmoq” filmi taqdim etilgan. Film Facebook’ning yaratilishi haqida hikoya qilgan. Ikkala aka-uka — Teylor va Kemeronning obrazini aktyor Armi Xammer yaratgan. Film ijodkorlarining aytishicha, ular Uinklvosslar roliga mos keluvchi egizak aktyorlarni topa olmagan.
Uinklvosslar birinchi bo‘lmasligi mumkin
Uinklvosslar 2013-yilda 100 mingta bitkoin sotib olganini yashirmagan. Aksincha, ular bu bilan faxrlangan. Aka-ukaning milliarder bo‘lganini tushunish uchun ularga tegishli bitkoinning AQSh dollaridagi qiymatini hisoblash yetarli. Bunda aynan Uinklvosslar dunyodagi birinchi bitkoin milliarderlar deyish mumkin emas. Chunki kim qancha kriptovalyutaga egalik qilishi haqida aniq ma’lumotlar yo‘q.
Eng ko‘p bitkoinga egalik qiluvchi kishi uning yaratuvchisi Satoshi Nakamoto, deb hisoblanadi. Taxminlarga ko‘ra, unda bir millionta bitkoin bor. Biroq bu ma’lumot, shuningdek, Satoshi Nakamotoning aslida kim ekanligi haqidagi ma’lumot hech qachon tasdiqlanmagan.
Izoh (0)