“Gazeta.uz” nashri rasmiy organlar tomonidan mamlakat yo‘llarida yuz berayotgan yo‘l-transport hodisalari qurbonlari soniga doir raqamlar e’lon qilinmayotganiga munosabat bildirdi. “Daryo” ushbu munosabatni o‘zbek tiliga (bir xatboshisini qisqartirgan holda) tarjima qildi.
Mazkur axborotni 15-noyabr kuni Prezident Shavkat Mirziyoyev tomonidan huquqbuzarliklar profilaktikasi va jinoyatchilikka qarshi kurash masalalariga bag‘ishlab o‘tkazilgan yig‘ilishdan so‘ng, Ichki ishlar vazirligi (IIV)ning Yo‘l harakati xavfsizligi bosh boshqarmasi matbuot xizmati taqdim eta boshladi.
Statistik ma’lumotlarni e’lon qilish — rivojlangan mamlakatlar uchun ham, rivojlanayotgan mamlakatlar uchun ham xos standart amaliyot. O‘zbekistonda bunday statistikaning e’lon qilinishi nimasi bilan o‘ziga molik? Shunisi bilanki, IIV so‘nggi bir necha yildan beri YTHlar statistikasini e’lon qilmasdi. Faqat YTHlar soni kamayayotgani foizlarda ko‘rsatilardi, xolos.
Yuqorida qayd etib o‘tilgan yig‘ilishda joriy yilning dastlabki 10 oyida 8000 ga yaqin YTH oqibatida 2031 kishi halok bo‘lgani va 7622 kishi tan jarohati olgani aytib o‘tilgan edi. Bu — O‘zbekiston yo‘llarida yil boshidan beri har kuni taxminan 7 kishi halok bo‘lgani va 25 kishi tan jarohati olganini anglatadi.
O‘zA tomonidan e’lon qilingan axborotga ko‘ra, noyabrning uchinchi haftasida 223 yo‘l-transport hodisasi oqibatida 216 fuqaro tan jarohati olgan (kuniga taxminan o‘rtacha 31 kishi). O‘tgan hafta esa 198 YTH yuz bergan, unda 194 kishi jabrlangan (kuniga taxminan 28 kishi).
Har ikkala xabarda ham YTHlar oqibatida halok bo‘lganlar haqidagi axborot berilmagan. Buni ketma-ket ikki hafta davomida mamlakat yo‘llarida hech kim halok bo‘lmagan, deya qabul qilishni istaydi kishi. Biroq, bu boradagi raqamlarni shunchaki e’lon qilmaslik ma’qul ko‘rilgan, degan fikrga ko‘proq ishonadi odam.
O‘tgan hafta Toshkent shahar IIBB yo‘llardagi o‘lim holati bilan bog‘liq kamida bitta axborot berdi (boshqarmaning ochiqligi ko‘plab idoralar uchun namuna bo‘la oladi). 24-noyabr kuni soat 22:50 da Matiz avtomobili Toshkent halqa avtomobil yo‘lida piyodani urib yuborgan. Uning ortidan kelayotgan Spark esa yo‘lda yotgan odamni bosib ketgan. Jabrlanuvchi — 1987-yilda tug‘ilgan erkak — olgan jarohatlari oqibatida hodisa joyida vafot etgan. Voqea joyidan yashiringan birinchi avtomobil haydovchisi ertasiga qo‘lga olingan.
Inson hayoti va salomatligiga aloqador har qanday soha statistikasi ochiq va ishonchli bo‘lishi kerak. Faqat shu yo‘l bilangina jamiyatning mas’ul xizmatlar faoliyatiga ishonchi ta’minlanadi va ularning ish samaradorligiga baho beriladi.
Izoh (0)