«Газета.uz» нашри расмий органлар томонидан мамлакат йўлларида юз бераётган йўл-транспорт ҳодисалари қурбонлари сонига доир рақамлар эълон қилинмаётганига муносабат билдирди. «Дарё» ушбу муносабатни ўзбек тилига (бир хатбошисини қисқартирган ҳолда) таржима қилди.
Мазкур ахборотни 15 ноябрь куни Президент Шавкат Мирзиёев томонидан ҳуқуқбузарликлар профилактикаси ва жиноятчиликка қарши кураш масалаларига бағишлаб ўтказилган йиғилишдан сўнг, Ички ишлар вазирлиги (ИИВ)нинг Йўл ҳаракати хавфсизлиги бош бошқармаси матбуот хизмати тақдим эта бошлади.
Статистик маълумотларни эълон қилиш — ривожланган мамлакатлар учун ҳам, ривожланаётган мамлакатлар учун ҳам хос стандарт амалиёт. Ўзбекистонда бундай статистиканинг эълон қилиниши нимаси билан ўзига молик? Шуниси биланки, ИИВ сўнгги бир неча йилдан бери ЙТҲлар статистикасини эълон қилмасди. Фақат ЙТҲлар сони камаяётгани фоизларда кўрсатиларди, холос.
Юқорида қайд этиб ўтилган йиғилишда жорий йилнинг дастлабки 10 ойида 8000 га яқин ЙТҲ оқибатида 2031 киши ҳалок бўлгани ва 7622 киши тан жароҳати олгани айтиб ўтилган эди. Бу — Ўзбекистон йўлларида йил бошидан бери ҳар куни тахминан 7 киши ҳалок бўлгани ва 25 киши тан жароҳати олганини англатади.
ЎзА томонидан эълон қилинган ахборотга кўра, ноябрнинг учинчи ҳафтасида 223 йўл-транспорт ҳодисаси оқибатида 216 фуқаро тан жароҳати олган (кунига тахминан ўртача 31 киши). Ўтган ҳафта эса 198 ЙТҲ юз берган, унда 194 киши жабрланган (кунига тахминан 28 киши).
Ҳар иккала хабарда ҳам ЙТҲлар оқибатида ҳалок бўлганлар ҳақидаги ахборот берилмаган. Буни кетма-кет икки ҳафта давомида мамлакат йўлларида ҳеч ким ҳалок бўлмаган, дея қабул қилишни истайди киши. Бироқ, бу борадаги рақамларни шунчаки эълон қилмаслик маъқул кўрилган, деган фикрга кўпроқ ишонади одам.
Ўтган ҳафта Тошкент шаҳар ИИББ йўллардаги ўлим ҳолати билан боғлиқ камида битта ахборот берди (бошқарманинг очиқлиги кўплаб идоралар учун намуна бўла олади). 24 ноябрь куни соат 22:50 да Matiz автомобили Тошкент ҳалқа автомобиль йўлида пиёдани уриб юборган. Унинг ортидан келаётган Spark эса йўлда ётган одамни босиб кетган. Жабрланувчи — 1987 йилда туғилган эркак — олган жароҳатлари оқибатида ҳодиса жойида вафот этган. Воқеа жойидан яширинган биринчи автомобиль ҳайдовчиси эртасига қўлга олинган.
Инсон ҳаёти ва саломатлигига алоқадор ҳар қандай соҳа статистикаси очиқ ва ишончли бўлиши керак. Фақат шу йўл билангина жамиятнинг масъул хизматлар фаолиятига ишончи таъминланади ва уларнинг иш самарадорлигига баҳо берилади.
Изоҳ (0)