Rossiyada avtomobil haydovchilarini professionallar va havaskorlarga bo‘lish rejalashtirilmoqda. Bu haqda “Rossiyskaya gazeta” xabar berdi.
Professionallar avtobus, yuk mashinalarini boshqarishi, taksi haydashi, havaskorlar esa avtodan shaxsiy maqsadda foydalanishi mumkin.
Haydovchilik guvohnomalarida professional tayyorgarlikni tasdiqlovchi belgi paydo bo‘lishi kutilmoqda. Mazkur belgi bo‘lmagan taqdirda talabgor haydovchi sifatida ishga olinmaydi.
Professionallar va havaskorlar turli dasturlar asosida o‘qitiladi. Birinchilar uchun, tabiiyki, uning ko‘lami kengroq bo‘ladi. Jumladan, ular ko‘zda tutilmagan vaziyatlarda mashinani boshqarish, tirkama yoki ikki qavatli avtobuslarni haydash, xavfli yuk yoki yo‘lovchilarni tashishga o‘rgatiladi. Ular 5 yilda bir marotaba qayta imtihon topshirishi ko‘zda tutilgan.
Haydovchilarni tayyorlash tizimini isloh qilishni Rossiya transport vazirligi taklif etmoqda. Maqsad professional haydovchilar tayyorlash sifatini oshirishdan iborat. Shu bilan birga, ushbu yangilik joriy etilguncha olingan guvohnomalar ham amalda bo‘ladi.
Izoh (0)