Buxoro viloyati hokimi O‘ktam Barnoyev viloyatning turistik logotipi va uning tavsifini tasdiqladi. Bu haqda O‘zbekiston Turizmni rivojlantirish davlat qo‘mitasi matbuot xizmati xabar berdi.
Buxoroning tasdiqlangan turizm logotipi quyidagicha tavsiflanadi:
- ikki o‘rkachli va qanotli tuya timsoli – chidamlilik, kuchlilik, g‘alaba va farovonlikni aks ettiruvchi belgi hamda tarixda Buxorxudotlarning ramzlaridan biri, umrboqiylik, kuch-quvvat va donolikni tasvirlaydi;
- shu kabi, ikki o‘rkachli va qo‘sh qanotli tuya ko‘rinishi – ilk o‘rta asrlarda Buxoro hukumdorlarining taxti ham shu shaklda ishlanganligiga qiyoslanadi;
- ramzning bodom shakli – qadimiy Buxoro davlatchiligida davlat muhrlari ham shu shaklda bo‘lganligini anglatadi;
- ramz o‘rtasida Buxoroning panoramasi, xususan, Poyi Kalon ansambli keltirilganligi – Buxoroda qadimdan buyuk bunyodkorlik va noyob arxitektura namunalari mavjudligidan dalolat beradi;
- belgining ort qismi fondagi quyosh – vohada oftobli kunlarning ko‘pligi va unumdorlikka ishora;
- sakkiz burchakli yulduz shakli – Buxoroning sharif va muqaddas shahar sifatida tanilganligi va mukammalligi timsoli;
- yulduz ichidagi besh burchakli yulduz va yarim oy – Islom dunyosidagi besh farzni, poklikni va ayni paytda O‘zbekiston mustaqilligi ma’nosini bildiradi;
- yulduz ichida berilgan moviy rang – musaffo osmon va hukm surayotgan tinchlik ramzi;
- bodom shaklidagi ikki chiziqli qobug‘ ichida o‘zbek va ingliz tillarida bitilgan (Holy Bukhara va Buxoroi sharif) yozuvlari Buxoroning Islom dunyosida tanilgan aziz nomini takrorlaydi;
- logotipni ikki chiziqli aylana ichiga olinganligi – Buxoroning ilm-fan, ta’lim va madaniyat o‘chog‘i hamda Buyuk Ipak Yo‘lidagi yirik savdo markazi sifatida qadimdan jahonda tanilgan maskanligini aks ettiradi;
- yozuvlar o‘rtasida yetti guldan iborat naqsh – hududda hunarmandchilikning taraqqiy etganligi hamda muqaddas Islom dini taraqqiyotiga katta hissa qo‘shgan avliyolar yurti va “Yetti pir” ziyoratgohlarining aynan Buxoroda joylashganligidan dalolat beradi;
- logotip qobig‘i va aylana ichidagi yashil ranglar – hamisha yoshlik, barhayotlik va boqiylik ma’nolarida keladi;
- aylana va bodom belgisi o‘rtasidagi sarg‘ish rang – Buxoroning issiq tabiiy iqlimi hamda tuprog‘i oltinga teng cho‘l o‘rtasidagi boqiy va hamisha navqiron yashil voha ekanligini bildiradi.
Ma’lum bo‘lishicha, logotip muallifini uni yaratishda Brandson Branding Agency ishtirokida ishlab chiqilgan “Maftunkor Rossiya” (“Charuyushchaya Rossiya”) logotipining umumiy dizayni va konsepsiyasini takrorlagan.
Izoh (0)