Бухоро вилояти ҳокими Ўктам Барноев вилоятнинг туристик логотипи ва унинг тавсифини тасдиқлади. Бу ҳақда Ўзбекистон Туризмни ривожлантириш давлат қўмитаси матбуот хизмати хабар берди.
Бухоронинг тасдиқланган туризм логотипи қуйидагича тавсифланади:
- икки ўркачли ва қанотли туя тимсоли – чидамлилик, кучлилик, ғалаба ва фаровонликни акс эттирувчи белги ҳамда тарихда Бухорхудотларнинг рамзларидан бири, умрбоқийлик, куч-қувват ва доноликни тасвирлайди;
- шу каби, икки ўркачли ва қўш қанотли туя кўриниши – илк ўрта асрларда Бухоро ҳукумдорларининг тахти ҳам шу шаклда ишланганлигига қиёсланади;
- рамзнинг бодом шакли – қадимий Бухоро давлатчилигида давлат муҳрлари ҳам шу шаклда бўлганлигини англатади;
- рамз ўртасида Бухоронинг панорамаси, хусусан, Пойи Калон ансамбли келтирилганлиги – Бухорода қадимдан буюк бунёдкорлик ва ноёб архитектура намуналари мавжудлигидан далолат беради;
- белгининг орт қисми фондаги қуёш – воҳада офтобли кунларнинг кўплиги ва унумдорликка ишора;
- саккиз бурчакли юлдуз шакли – Бухоронинг шариф ва муқаддас шаҳар сифатида танилганлиги ва мукаммаллиги тимсоли;
- юлдуз ичидаги беш бурчакли юлдуз ва ярим ой – Ислом дунёсидаги беш фарзни, покликни ва айни пайтда Ўзбекистон мустақиллиги маъносини билдиради;
- юлдуз ичида берилган мовий ранг – мусаффо осмон ва ҳукм сураётган тинчлик рамзи;
- бодом шаклидаги икки чизиқли қобуғ ичида ўзбек ва инглиз тилларида битилган (Holy Bukhara ва Бухорои шариф) ёзувлари Бухоронинг Ислом дунёсида танилган азиз номини такрорлайди;
- логотипни икки чизиқли айлана ичига олинганлиги – Бухоронинг илм-фан, таълим ва маданият ўчоғи ҳамда Буюк Ипак Йўлидаги йирик савдо маркази сифатида қадимдан жаҳонда танилган масканлигини акс эттиради;
- ёзувлар ўртасида етти гулдан иборат нақш – ҳудудда ҳунармандчиликнинг тараққий этганлиги ҳамда муқаддас Ислом дини тараққиётига катта ҳисса қўшган авлиёлар юрти ва «Етти пир» зиёратгоҳларининг айнан Бухорода жойлашганлигидан далолат беради;
- логотип қобиғи ва айлана ичидаги яшил ранглар – ҳамиша ёшлик, барҳаётлик ва боқийлик маъноларида келади;
- айлана ва бодом белгиси ўртасидаги сарғиш ранг – Бухоронинг иссиқ табиий иқлими ҳамда тупроғи олтинга тенг чўл ўртасидаги боқий ва ҳамиша навқирон яшил воҳа эканлигини билдиради.
Маълум бўлишича, логотип муаллифини уни яратишда Брандсон Брандинг Агенcй иштирокида ишлаб чиқилган «Мафтункор Россия» («Чаруюшчая Россия») логотипининг умумий дизайни ва концепциясини такрорлаган.
Изоҳ (0)