MRB Usama ben Ladenning Abbotoboddagi boshpanasidan topilgan 470 mingga yaqin hujjatni e’lon qildi. Ular orasida Ben Ladenning shaxsiy yozishmalari, “Al-Qoida” sobiq rahbari o‘z nutqlarini mashq qilgan o‘n minglab videolar, audioyozuvlar mavjud, deb xabar berdi Meduza.
Shuningdek, uning arxivida internetdan ko‘chirib olingan ko‘plab videoyozuvlar topilgan. Ulardan biri Loose Change 2 filmi bo‘lib, unda 2001-yil 11-sentabrdagi terakt AQSh hukumati tomonidan amalga oshirilgani haqida so‘z boradi.
Markaziy razvedka boshqarmasi materiallarning ba’zilarini turli sabablarga ko‘ra chop etmadi. Jumladan, pornografik roliklar, maxfiy ma’lumotlar joy olgan materiallar va mualliflik huquqi bilan himoyalangan kontentlar e’lon qilinmadi. Masalan, yuqoridagi sabablarga ko‘ra, Ben Ladenning boshpanasidan topilgan Cars, Resident Evil filmlari, Final Fantasy VII o‘yini, “Usama Ben Ladenning biografiyasi” hujjatli filmi va “Al-Qoida” rahbarining qidiruviga bag‘ishlangan “Ben Laden qayerga yashiringan?” filmlari e’lon qilinmadi.
Izoh (0)