Suriyaning Dayr-az-Zor viloyatidagi Mayadin shahri va uning atroflariga berilgan aviazarbalar oqibatida kamida 25 kishi, jumladan, ayollar va bolalar halok bo‘ldi. Bu haqda 3-noyabr kuni BMT bosh kotibining rasmiy vakili Stefan Dyujarrik jurnalistlarga ma’lum qildi, deb xabar berdi “TASS”.
Uning so‘zlariga ko‘ra, BMTning gumanitar agentliklari “Dayr-az-Zor viloyatida sodir bo‘layotgan to‘qnashuvlar oqibatidan chuqur xavotirda”. “Kecha Mayadin va uning atrofiga berilgan aviazarbalar 25 dan ortiq odamning o‘limiga va ko‘plab insonlarning jarohat olishiga sabab bo‘ldi. Ularning aksariyati ayollar va bolalar”, — dedi Dyujarrik.
Rasmiy vakilning ma’lum qilishicha, avgust oyidan beri jangovar harakatlar sababli Dayr-az-Zorni 350 mingdan ortiq aholi tark etgan. Ushbu hududdagi gumanitar vaziyat jiddiyligicha qolmoqda. Viloyatga gumanitar yordam so‘nggi bor 30-oktabrda jo‘natilgan.
BMT Suriya mojarosi tomonlarini “aholini himoya qilish uchun barcha choralarni ko‘rishga”, shuningdek, mamlakatning barcha muhtoj fuqarolariga gumanitar yordamlarni xavfsiz va muammosiz yetib borishida yordam ko‘rsatishga chaqirdi.
Izoh (0)