Бен Ладеннинг бошпанасидан «Бен Ладен қаерга яширинган?» фильми топилди

МРБ Усама бен Ладеннинг Абботободдаги бошпанасидан топилган 470 мингга яқин ҳужжатни эълон қилди. Улар орасида Бен Ладеннинг шахсий ёзишмалари, «Ал-Қоида» собиқ раҳбари ўз нутқларини машқ қилган ўн минглаб видеолар, аудиоёзувлар мавжуд, деб хабар берди Meduza.

Шунингдек, унинг архивида интернетдан кўчириб олинган кўплаб видеоёзувлар топилган. Улардан бири Loose Change 2 фильми бўлиб, унда 2001 йил 11 сентябрдаги теракт АҚШ ҳукумати томонидан амалга оширилгани ҳақида сўз боради.

Марказий разведка бошқармаси материалларнинг баъзиларини турли сабабларга кўра чоп этмади. Жумладан, порнографик роликлар, махфий маълумотлар жой олган материаллар ва муаллифлик ҳуқуқи билан ҳимояланган контентлар эълон қилинмади. Масалан, юқоридаги сабабларга кўра, Бен Ладеннинг  бошпанасидан топилган Cars, Resident Evil фильмлари, Final Fantasy VII ўйини, «Усама Бен Ладеннинг биографияси» ҳужжатли фильми ва «Ал-Қоида» раҳбарининг қидирувига бағишланган «Бен Ладен қаерга яширинган?» фильмлари эълон қилинмади.