Malayziya tergovchilari ilk bor KXDR yetakchisining akasi Kim Chon Namni o‘ldirishda ayblanayotgan yana 4 kishining nomini ma’lum qildi. Bu haqda “TASS” xabar bermoqda.
Tergov guruhi vakili Van Azirul Nizom 12-oktabr kuni Oliy sud majlisidagi chiqishi chog‘ida ularning Kim Chon Namni zaharlashdagi ishtiroki sudlanuvchi ikki ayolni so‘roqqa tutish natijasida aniqlanganini bildirdi.
Vakilga ko‘ra, erkaklardan biri operatsiyaga rahbarlik qilgan, ikkinchisi qizlarni yollagan. Yana bir shaxs Vyetnam fuqarosi Doan Txi Xuongga VX asab-falaj moddasi ekanligi taxmin qilingan suyuqlik bergan, ikkinchisi Indoneziya fuqarosi Siti Aysianing qo‘liga moyli modda surtgan.
Van Azirul Nizom gap 13-fevral — Kim Chon Nam o‘ldirilgan kuni Kuala-Lumpurni tark etgan va Pxenyanga qaytgan Shimoliy Koreyaning 4 fuqarosi haqida ketayotganligi yoki yo‘qligiga aniqlik kiritmadi. Ular deyarli o‘sha zahoti Interpol orqali xalqaro qidiruvga berilgandi.
Izoh (0)