AQSh tomonidan Xirosima shahrining bombardimon qilinishiga guvoh bo‘lgan yapon yozuvchisi Dzyunko Morimoto 85 yoshida vafot etdi. Bu haqda The Daily Telegraph xabar berdi.
Ta’kidlanishicha, Morimoto o‘limi arafasida Avstraliya bosh vaziri Malkolm Ternbullga murojaat qilib, yadro qurolini taqiqlash haqidagi kelishuvni imzolashga chaqirgan. “Ba’zi bombalar yo‘q qilinganiga qaramasdan, dunyoda hali 15 mingta bomba mavjud — bu dunyomizni ko‘p marotaba yo‘q qilib yuborish uchun yetarli”, — deb qayd etgan marhum yozuvchi.
1945-yilning 6-avgustida Xirosima bombardimon qilinganda Morimoto portlash epimarkazidan 1,7 kilometr uzoqlikda bo‘lgan. O‘sha vaqtda u 13 yoshda edi, bomba tashlangan kuni kasal bo‘lgani sababli maktabga bormagan edi. Uning uyi portlash to‘lqini ostida vayron bo‘lgan, biroq u oilasi bilan vayronalar ostidan chiqishga muvaffaq bo‘lgan.
1980-yilda Morimoto Avstraliyaga ko‘chib o‘tgan va u yerda bolalar uchun 14 ta kitob chop etgan. Ularning orasida eng mashhuri “Mening Xirosimam” kitobi bo‘lib, unda muallif qanday qilib bombardimonda omon qolgani tasvirlangan. Yozuvchi so‘nggi yillarda miyadagi shish kasalligi bilan kurashgan.
AQSh 1945-yilning avgust oyida Ikkinchi jahon urushida qarshilik qilishda davom etayotgan Yaponiyani taslim qilish jarayonini tezlashtirish uchun Xirosima va Nagasaki shaharlariga atom bombasi tashlagan. Ma’lumotlarga ko‘ra, ikki shaharda halok bo‘lganlarning umumiy soni 150 mingdan 240 ming kishigacha bo‘lgan. Bunday turdagi qurolning tinch aholiga nisbatan qo‘llanilishi insoniyat tarixida birinchi va oxirgi marta yuz bergan edi.
Izoh (0)