АҚШ томонидан Хиросима шаҳрининг бомбардимон қилинишига гувоҳ бўлган япон ёзувчиси Дзюнко Моримото 85 ёшида вафот этди. Бу ҳақда The Daily Telegraph хабар берди.
Таъкидланишича, Моримото ўлими арафасида Австралия бош вазири Малколм Тернбуллга мурожаат қилиб, ядро қуролини тақиқлаш ҳақидаги келишувни имзолашга чақирган. «Баъзи бомбалар йўқ қилинганига қарамасдан, дунёда ҳали 15 мингта бомба мавжуд — бу дунёмизни кўп маротаба йўқ қилиб юбориш учун етарли», — деб қайд этган марҳум ёзувчи.
1945 йилнинг 6 августида Хиросима бомбардимон қилинганда Моримото портлаш эпимарказидан 1,7 километр узоқликда бўлган. Ўша вақтда у 13 ёшда эди, бомба ташланган куни касал бўлгани сабабли мактабга бормаган эди. Унинг уйи портлаш тўлқини остида вайрон бўлган, бироқ у оиласи билан вайроналар остидан чиқишга муваффақ бўлган.
1980 йилда Моримото Австралияга кўчиб ўтган ва у ерда болалар учун 14 та китоб чоп этган. Уларнинг орасида энг машҳури «Менинг Хиросимам» китоби бўлиб, унда муаллиф қандай қилиб бомбардимонда омон қолгани тасвирланган. Ёзувчи сўнгги йилларда миядаги шиш касаллиги билан курашган.
АҚШ 1945 йилнинг август ойида Иккинчи жаҳон урушида қаршилик қилишда давом этаётган Японияни таслим қилиш жараёнини тезлаштириш учун Хиросима ва Нагасаки шаҳарларига атом бомбаси ташлаган. Маълумотларга кўра, икки шаҳарда ҳалок бўлганларнинг умумий сони 150 мингдан 240 минг кишигача бўлган. Бундай турдаги қуролнинг тинч аҳолига нисбатан қўлланилиши инсоният тарихида биринчи ва охирги марта юз берган эди.
Изоҳ (0)