Shveysariyaning Jeneva kantoni prokuraturasi 100 ming yevro miqdordagi pulni unitazga tushirib yuborgan kishilarni aniqladi. Bu haqda Jeneva kantoni prokuraturasining matbuot kotibi Vinsent Deruanga tayanib, “RIA Novosti” xabar berdi.
Uning so‘zlariga ko‘ra, agar pullar qonuniy ravishda qo‘lga kiritilgan bo‘lsa, ayollarga hech qanday jazo berilmaydi. Chunki Shveysariyada pullarga zarar yetkazish jinoyat hisoblanmaydi.
“Agar pullar noqonuniy faoliyat bilan bog‘liq bo‘lsa, bu boshqa masala. Ayni vaqtda ayollar aybdor hisoblanmaydi. Biroq ularning advokati allaqchon politsiya tomonidan eshitilgan”, — deb qo‘shimcha qildi matbuot kotibi.
Bir necha oy oldin UBS Group AG moliyaviy xoldingining Jeneva bo‘limidagi bank g‘aznasi yonidagi hojatxonada 500 yevrolik banknotlar topilgan. Bir necha kundan so‘ng kupyuralar yaqin atrofda joylashgan Café du Centre va Molino restoranlarining hojatxonalarini ifloslantirgan. Ko‘plab kupyuralar qaychilar bilan kesilgan edi.
Muassasalar quvurlarni tozalatish uchun santexnika xizmatlariga ming frank to‘lagan. Shundan so‘ng Shveysariya prokuraturasi nima uchun noma’lum kishi unitazga o‘n minglab yevroni tushirib yuborganini o‘rganish uchun tergov boshlagan.
Vinsent Deruanning ta’kidlashicha, bank va restoran tomonidan kanalizatsiya tizimini tozalatish uchun qilingan xarajatlarining bir qismi kompensatsiya qilingan — ispan ayollarning advokati muassasalar bilan bog‘langan va ularga to‘lov taklif qilgan.
Izoh (0)