Sent-Luis (Missuri shtati, AQSh) okrug sudi 15-sentabr, juma kuni 2011-yilda qora tanli Entoni Lamar Smitni otib tashlagan sobiq politsiya xodimi Jeyson Stoklini aybsiz deb topdi. Hukm chiqarilganidan so‘ng, shaharda norozilik namoyishlari boshlandi. Bu haqda CNN telekanaliga tayanib, “TASS” xabar berdi.
2011-yilning dekabrida Stokli va uning hamkasbi Smitni giyohvand moddalar sotishda gumonlab, uni qo‘lga olishga harakat qilgan. Natijada ta’qibni amalga oshirgan politsiyachilarning yo‘ltanlamasi afroamerikalik yashirinishga uringan avtomobilga borib urilgan. Stokli Smitga qarata besh marta o‘q uzishi oqibatida u voqea joyiga halok bo‘lgan. Ushbu noxush hodisadan so‘ng, Stoklini yetarlicha asosga ega bo‘lmasdan turib o‘t ochgani uchun ayblashgan va u 2013-yilda xizmatdan bo‘shash arizasini yozgan.
Sobiq politsiyachi ustidan sud ishi o‘tgan yili boshlangan edi. Ayblovchi tomonning ta’kidlashicha, Stokli avvaldanoq hech qanday asossiz Smitni otib tashlashga qaror qilgan. Ushbu taxmin yuzasidan audioyozuv taqdim etilgan bo‘lib, unda Stokli gumonlanuvchining ortidan quvayotgan vaqtda uni otib tashlashi haqida gapirgan. Shuningdek, ayblovchi tomonning qayd etishicha, Smitning yonida qurol bo‘lmagan, uning mashinasidan topilgan to‘pponchani esa politsiyachilar tashlab qo‘ygan.
Stoklining ishini ko‘rib chiqqan sudya Timoti Uilson politsiyachiga nisbatan dalillar yetarlicha bo‘lmagani uchun uni aybsiz deb topdi.
St. Louis Post-Dispatch mahalliy gazetasining yozishicha, hukm o‘qilganidan so‘ng, Sent-Luisda norozilik namoyishlari boshlangan bo‘lib, unda yuzga yaqin odam ishtirok etmoqda. Yo‘lni yopib qo‘yishga harakat qilgan namoyish ishtirokchilariga bir necha o‘nlab politsiyachilar xalaqit berdi.
Izoh (0)