Сент-Луис (Миссури штати, АҚШ) округ суди 15 сентябрь, жума куни 2011 йилда қора танли Энтони Ламар Смитни отиб ташлаган собиқ полиция ходими Жейсон Стоклини айбсиз деб топди. Ҳукм чиқарилганидан сўнг, шаҳарда норозилик намойишлари бошланди. Бу ҳақда CNN телеканалига таяниб, «ТАСС» хабар берди.
2011 йилнинг декабрида Стокли ва унинг ҳамкасби Смитни гиёҳванд моддалар сотишда гумонлаб, уни қўлга олишга ҳаракат қилган. Натижада таъқибни амалга оширган полициячиларнинг йўлтанламаси афроамерикалик яширинишга уринган автомобилга бориб урилган. Стокли Смитга қарата беш марта ўқ узиши оқибатида у воқеа жойига ҳалок бўлган. Ушбу нохуш ҳодисадан сўнг, Стоклини етарлича асосга эга бўлмасдан туриб ўт очгани учун айблашган ва у 2013 йилда хизматдан бўшаш аризасини ёзган.
Собиқ полициячи устидан суд иши ўтган йили бошланган эди. Айбловчи томоннинг таъкидлашича, Стокли аввалданоқ ҳеч қандай асоссиз Смитни отиб ташлашга қарор қилган. Ушбу тахмин юзасидан аудиоёзув тақдим этилган бўлиб, унда Стокли гумонланувчининг ортидан қуваётган вақтда уни отиб ташлаши ҳақида гапирган. Шунингдек, айбловчи томоннинг қайд этишича, Смитнинг ёнида қурол бўлмаган, унинг машинасидан топилган тўппончани эса полициячилар ташлаб қўйган.
Стоклининг ишини кўриб чиққан судья Тимоти Уилсон полициячига нисбатан далиллар етарлича бўлмагани учун уни айбсиз деб топди.
St. Louis Post-Dispatch маҳаллий газетасининг ёзишича, ҳукм ўқилганидан сўнг, Сент-Луисда норозилик намойишлари бошланган бўлиб, унда юзга яқин одам иштирок этмоқда. Йўлни ёпиб қўйишга ҳаракат қилган намойиш иштирокчиларига бир неча ўнлаб полициячилар халақит берди.
Изоҳ (0)