Birlashgan millatlar tashkiloti Yamandagi urushlar mobaynida tinch aholi vakillari o‘rtasida 5144 ta o‘lim holatini qayd etdi. Bu haqda Jenevada bo‘lib o‘tgan birifingda BMTning inson huquqlari bo‘yicha oliy komissari Zayd Raad al-Husayn ma’lum qildi, deb yozadi “Korrespondent.net”.
BMT ma’lumotlariga ko‘ra, aksariyat insonlar Saudiya Arabistoni boshchiligidagi koalitsiyalar tomonidan berilgan aviazarbalar oqibatida halok bo‘lgan. Zayd Raad al-Husayn mazkur faktlar yuzasidan zudlik bilan tekshirish ishlari o‘tkazish lozimligini qo‘shimcha qildi.
U, shuningdek, Yamanda 2017-yilning aprelidan buyon 650 mingga yaqin kishi vabo bilan og‘riganini ma’lum qildi.
Yamandagi qurolli ziddiyat 2014-yilning martidan boshlab davom etmoqda. Isyonchi xusiylar Saudiya Arabistoni boshchiligidagi koalitsiya kuchlarini qo‘llab-quvvatlovchi prezident Abd Rabbo Mansur Xodining armiyasiga qarshilik ko‘rsatadi.
Mamlakat hududining bir qismi “Al-Qoida” terrorchilari tomonidan nazorat qilinadi.
Izoh (0)