Avstraliyaning Darvin shahrida yashovchi Tomas Meyson ish yuzasidan Janubiy Avstraliya shtati va Shimoliy hudud chegarasidagi aborigenlar rezervatsiyasiga yo‘l olgan. U Alis-Springsga samolyotda kelgan va manzilga mashinada yetib olgan, deb yozmoqda National Geographic.
Qaytishda u xuddi shu yo‘lni qayta bosib o‘tishi kerak bo‘lgan, biroq yo‘lda u tuyalar to‘dasiga duch kelgan. Hayvonlarni aylanib o‘tishga harakat qilgan yigit ulardan birini mashinada urib yuborgan. Tomasning o‘zi jarohat olmagan bo‘lsa ham, u mashinda yo‘lni davom ettira olmagan, chunki avtomobil pachoqlangan edi. Eng yaqin shahardan 150 kilometr uzoqlikda — cho‘ldagi yo‘lda qolib ketgan yigit yagona qarorni qabul qildi. U yo’lni piyoda davom ettirishga qaror qildi.
Unda ovqat, suv, mobil aloqa bo‘lmagan. Keyin esa telefonini butunlay yo‘qotgan. Undagi foydali narsa faqat fonar bo‘lgan. Yo‘lda u ichida suvi bo‘lgan idishni topib olgan. Suv kam bo‘lgani sababli darrov tugagan va shunda u o‘z peshobini ichishga majbur bo‘lgan. “Agar bu yerda qolsam, o‘laman”, — deb o‘ylagan va yo‘lda davom etgan.
Qidiruv guruhi hodisa yuz berganidan bir kun o‘tib yuborilgan. Tomasning samolyotga chiqmaganini bilgan ota-onasi qidiruv ishlarini boshlagan. 60 soatdan so‘ng qutqaruvchilar yigitni Yulara nomli kichik shahardan 37 kilometr uzoqlikda topgan. Bu vaqtga kelib u taxminan 140 kilometr masofani bosib o‘tgan edi.
Izoh (0)