Австралиянинг Дарвин шаҳрида яшовчи Томас Мейсон иш юзасидан Жанубий Австралия штати ва Шимолий ҳудуд чегарасидаги аборигенлар резервациясига йўл олган. У Алис-Спрингсга самолётда келган ва манзилга машинада етиб олган, деб ёзмоқда National Geographic.
Қайтишда у худди шу йўлни қайта босиб ўтиши керак бўлган, бироқ йўлда у туялар тўдасига дуч келган. Ҳайвонларни айланиб ўтишга ҳаракат қилган йигит улардан бирини машинада уриб юборган. Томаснинг ўзи жароҳат олмаган бўлса ҳам, у машинда йўлни давом эттира олмаган, чунки автомобиль пачоқланган эди. Энг яқин шаҳардан 150 километр узоқликда — чўлдаги йўлда қолиб кетган йигит ягона қарорни қабул қилди. У йўлни пиёда давом эттиришга қарор қилди.
Унда овқат, сув, мобил алоқа бўлмаган. Кейин эса телефонини бутунлай йўқотган. Ундаги фойдали нарса фақат фонар бўлган. Йўлда у ичида суви бўлган идишни топиб олган. Сув кам бўлгани сабабли дарров тугаган ва шунда у ўз пешобини ичишга мажбур бўлган. «Агар бу ерда қолсам, ўламан», — деб ўйлаган ва йўлда давом этган.
Қидирув гуруҳи ҳодиса юз берганидан бир кун ўтиб юборилган. Томаснинг самолётга чиқмаганини билган ота-онаси қидирув ишларини бошлаган. 60 соатдан сўнг қутқарувчилар йигитни Юлара номли кичик шаҳардан 37 километр узоқликда топган. Бу вақтга келиб у тахминан 140 километр масофани босиб ўтган эди.
Изоҳ (0)