AQShlik dasturchi faqat internetsiz ishlaydigan saytni yaratdi

Amerikaning Formidable kompaniyasi dasturchisi Kris Bolin faqat oflayn rejimida ishlaydigan saytni yaratdi, deb yozadi TJournal. Agar unga internetga ulangan holda kirsangiz, sahifada internetni o‘chirib qo‘yish haqidagi iltimos paydo bo‘ladi.

Foydalanuvchi internetni uzib qo‘ygach, u Bolinning murojaati yozilgan sahifaga tushib qoladi. Uning mazmuni shundan iboratki, internet bizning mahsuldorligimizga kuchli ta’sir qiladi.

“Siz vaqtingizni unumli o‘tkazmoqchimisiz? Unda shunchaki oflayn bo‘ling. Doimiy ravishda internetda bo‘lish — ham tashqi, ham ichki chalg‘ituvchi omillar qurshovida bo‘lish demakdir”, — deb yozadi u.

Tashqi chalg‘ituvchi omillarga Bolin ijtimoiy tarmoq va pochta qutilaridagi xatlarni kiritdi, ichkilariga esa — foydalanuvchilarni internetga kirib, ijtimoiy tarmoqlarni tekshirishga undaydigan qiziquvchanlikni misol qildi.

Bolinning fikricha, faqat oflaynda o‘qish mumkin bo‘lgan kontent foydalanuvchilarga turtki beradi va ularni boshqacha fikrlashga undaydi. Uning so‘zlariga ko‘ra, foydalanuvchilar ko‘pincha maqolalarni oxirigacha o‘qimasligiga ularda juda ko‘p chalg‘ituvchi linklar borligi sababchidir.

Bolin ko‘pchilikning ishi internet bilan bog‘liq bo‘lsa-da, har doim oflaynda ishlab ko‘rish uchun bo‘sh vaqt topish mumkinligini ta’kidladi.