Американинг Formidable компанияси дастурчиси Крис Болин фақат офлайн режимида ишлайдиган сайтни яратди, деб ёзади TJournal. Агар унга интернетга уланган ҳолда кирсангиз, саҳифада интернетни ўчириб қўйиш ҳақидаги илтимос пайдо бўлади.
Фойдаланувчи интернетни узиб қўйгач, у Болиннинг мурожаати ёзилган саҳифага тушиб қолади. Унинг мазмуни шундан иборатки, интернет бизнинг маҳсулдорлигимизга кучли таъсир қилади.
«Сиз вақтингизни унумли ўтказмоқчимисиз? Унда шунчаки офлайн бўлинг. Доимий равишда интернетда бўлиш — ҳам ташқи, ҳам ички чалғитувчи омиллар қуршовида бўлиш демакдир», — деб ёзади у.
Ташқи чалғитувчи омилларга Болин ижтимоий тармоқ ва почта қутиларидаги хатларни киритди, ичкиларига эса — фойдаланувчиларни интернетга кириб, ижтимоий тармоқларни текширишга ундайдиган қизиқувчанликни мисол қилди.
Болиннинг фикрича, фақат офлайнда ўқиш мумкин бўлган контент фойдаланувчиларга туртки беради ва уларни бошқача фикрлашга ундайди. Унинг сўзларига кўра, фойдаланувчилар кўпинча мақолаларни охиригача ўқимаслигига уларда жуда кўп чалғитувчи линклар борлиги сабабчидир.
Болин кўпчиликнинг иши интернет билан боғлиқ бўлса-да, ҳар доим офлайнда ишлаб кўриш учун бўш вақт топиш мумкинлигини таъкидлади.
Изоҳ (0)