2016-yil kuzida AQShning Kubadagi elchixonasi xodimlari eshitish qobiliyatini yo‘qotganidan noliy boshladi. Taxminan besh nafar diplomat shunday shikoyat bilan murojaat qildi, deb xabar beradi Meduza.
Bunday dardga diplomatlarning rafiqalari ham chalindi. Ikki diplomat Kubani tark etdi. Ulardan biri hozir eshitish apparati bilan yurishga majbur.
AQSh amaldorlari norasmiy suhbatlarda bu xastalikni odamlar eshitmaydigan ovoz chiqara oladigan uskuna bilan bog‘lamoqda, deb xabar beradi AP. Uskunalar amerikaliklar yashaydigan uylarga yoki ularning atrofiga joylashtirilgani taxmin qilinmoqda.
Kuba rasmiylari o‘zlarining bu voqeaga aloqadorligini inkor qilmoqda. Mamlakat TIV bayonotiga ko‘ra, elchixona xodimlari bunday dardga chalingani haqida ular 2017-yil fevralida bilgan. Kubaning tegishli tashkilotlari surishtirishni boshlagan edi, ammo uning natijalari e’lon qilinmadi.
2017-yil mayida AQSh mamlakatdan ikki nafar kubalik diplomatni chiqarib yubordi. AQSh Davlat departamenti vakili Xizer Noyertning aytishicha, AQSh Kubani amerikalik diplomatlarni himoya qilmaslikda hamda bu bilan diplomatik munosabatlar to‘g‘risidagi Vena konvensiyasini buzgan.
AQSh diplomatlarga hujumni Rossiya yoki boshqa biror davlat uyushtirganini istisno qilmayapti.
Izoh (0)