Ta’kidlanishicha, joriy yilda oliy ta’lim muassasalariga 729 947 nafar abituriyent hujjat topshirgan, shulardan 7725 nafari muddatli harbiy xizmatni o‘tagan harbiy imtiyozga ega abituriyentlardir.
Xabarda aytilishicha, testdagi natijasidan qat’i nazar o‘qishga davlat granti asosida qabul qilingan abituriyentlar fan olimpiadalari g‘oliblari yoki “Zulfiya” mukofoti egalari emas. Ular maqsadli qabul asosida o‘qishga qabul qilinganlar hisoblanadi.
DTM bergan ma’lumotga ko‘ra, joriy yilda o‘rtacha tanlov 1 o‘ringa 11,0 tani tashkil etdi. Lekin ayrim OTMlardagi tanlov birga bir bo‘lgan, ya’ni nechta kvota ajratilgan bo‘lsa, shuncha abituriyent hujjat topshirgan.
Gap shundaki, joriy yilda nafaqat tibbiyot yo‘nalishlari, balki qishloq xo‘jaligi sohasida ham maqsadli qabul joriy etilgan. Ammo bu haqida deyarli hech qayerda aytilmagan, hech qayerda e’lon qilinmagan. Natijada ko‘pchilik bundan bexabar qolgan. Aholidagi ushbu bexabarlik to‘lqini topshirilgan hujjatlar soniga o‘z ta’sirini o‘tkazmay qolmadi.
Toshkent irrigatsiya va qishloq xo‘jaligini mexanizatsiyalash muhandislari institutining “Qishloq xo‘jaligi va meliorativ texnikalarning texnik servisi” yo‘nalishi bo‘yicha Xorazm va Farg‘ona viloyatlari uchun bittadan davlat grantida o‘rin ajratilgan bo‘lib, shu yo‘nalishga Xorazmdan 1 nafar, Farg‘onadan 1 nafar abituriyent hujjat topshirgan. Bu degani ushbu ikkala abituriyent testda necha ball olishidan qat’i nazar davlat granti asosida talabalikka qabul qilinadi. Chunki ularning boshqa raqobatchisi yo‘q.
Xuddi shunday holat Irrigatsiya institutining quyidagi yo‘nalishlarida ham uchraydi:
| Yo‘nalish nomi | Kvota soni | Abituriyent soni | |
| 1. | Hayotiy faoliyat xavfsizligi (Qoraqalpog‘iston Respublikasi) | 2 | 2 |
| 2. | Kasb ta’limi: yer tuzish va yer kadastri (Navoiy) | 2 | 2 |
| 3. | Kasb ta’limi: yer tuzish va yer kadastri (Andijon) | 1 | 1 |
| 4. | Kasb ta’limi: qishloq xo‘jaligini elektrlashtirish va avtomatlashtirish (Qoraqalpog‘iston Respublikasi) | 1 | 1 |
| 5. | Kasb ta’limi: qishloq xo‘jaligini elektrlashtirish va avtomatlashtirish (Andijon) | 1 | 1 |
| 6. | Iqtisodiyot (suv xo‘jaligida) (Andijon) | 1 | 1 |
| 7. | Menejment (suv xo‘jaligida) (Navoiy) | 1 | 1 |
| 8. | Texnika va texnologiyalarning texnik ekspertizasi va marketingi (turlari bo‘yicha) (Andijon) | 1 | 1 |
Qishloq xo‘jaligini elektrlashtirish va avtomatlashtirish (Navoiy)
Iqtisodiyot (suv xo‘jaligida) (Qoraqalpog‘iston Respublikasi)
Gidrotexnika inshootlari va nasos stansiyalaridan foydalanish (Qoraqalpog‘iston Respublikasi)
Geodeziya, kartografiya va kadastr (suv xo‘jaligida) (Qoraqalpog‘iston Respublikasi)
Texnologik jarayonlar va ishlab chiqarishni avtomatlashtirish va boshqarish (suv xo‘jaligida) (Xorazm)
Gidrotexnika qurilishi (suv xo‘jaligida) (Qoraqalpog‘iston Respublikasi)
Geodeziya, kartografiya va kadastr (suv xo‘jaligida) (Navoiy)
Qishloq xo‘jaligini elektrlashtirish va avtomatlashtirish (Jizzax)
Yer tuzish va yer kadastri (Farg‘ona)
Suv xo‘jaligi va melioratsiya ishlarini mexanizatsiyalashtirish (Qoraqalpog‘iston Respublikasi)
Qishloq xo‘jaligini mexanizatsiyalashtirish (Navoiy)
Ekologiya va atrof-muhit muhofazasi (suv xo‘jaligida) (Navoiy)
Ekologiya va atrof-muhit muhofazasi (suv xo‘jaligida) (Samarqand)
Yer tuzish va yer kadastri (Sirdaryo)
Suv xo‘jaligi va melioratsiya (Sirdaryo)
Shuningdek, Samarqand qishloq xo‘jaligi institutining “Zootexnika” (Andijon) va “Kasb ta’limi: qishloq xo‘jaligida menejment” (Farg‘ona) yo‘nalishlarida ham shunday holat mavjud.
Toshkent davlat agrar universitetining “Agrokimyo va agrotuproqshunoslik” yo‘nalishida Andijon viloyati uchun davlat granti asosida ajratilgan 1 ta o‘ringa ham atigi 1 nafar abituriyent hujjat topshirgan.
Xushnud Xudoyberdiyevning Facebook’dagi sahifasida ma’lum qilinishicha, 15 nafar abituriyent test natijalaridan qat’i nazar to‘lov kontrakti asosida o‘qishga qabul qilingan.
Xususan, “Oliy hamshiralik ishi” yo‘nalishi rus guruhlarida Toshkent pediatriya tibbiyot institutining Surxondaryo uchun hamda Toshkent tibbiyot akademiyasining Namangan viloyati uchun ajratilgan maqsadli qabul kvotalarida ham konkurs 1 ga teng. Eng qizig‘i, Toshkent tibbiyot akademiyasining “Oliy hamshiralik ishi” yo‘nalishi rus guruhida Farg‘ona viloyati uchun 2 ta davlat grantiga o‘rin ajratilgan bo‘lib, unga atigi 1 nafar abituriyent hujjat topshirgan. Konkurs 1 ga emas, yarimga teng.
O‘zbekiston davlat jismoniy tarbiya instituti “Sport faoliyati: eshkak eshish” yo‘nalishida jami 10 ta o‘rin (2 ta grant, 8 ta kontrakt) ajratilgan bo‘lib, unga jami 10 nafar abituriyent hujjat topshirgan. Bu degani ular orasidan 2 nafari grant, qolgani kontrakt asosida o‘qishga qabul qilindi. Faqat o‘zaro aniqlashtirib olishsa bo‘ldi.
Xuddi shu institutning "Sport faoliyati: xotin-qizlar sportini rivojlantirish” yo‘nalishi bo‘yicha rus tili guruhlarida Qoraqalpog‘iston, Jizzax, Surxondaryo hududlari uchun taqsimlangan kvotalarda ham xuddi shunday holat, ya’ni, konkurs birga teng. “Sport faoliyati: xotin-qizlar sportini rivojlantirish” yo‘nalishi bo‘yicha rus guruhiga Samarqand viloyatiga 4 ta o‘rin ajratilgan (2 ta grant, 2 ta kontrakt) bo‘lib, unga bor-yo‘g‘i 3 nafar abituriyent hujjat topshirgan.
Qolgan oliygohlardan farqli o‘laroq, ya’ni maqsadli qabul belgilanmagan Milliy rassomlik va dizayn institutining “Rangtasvir: multfilm va kompyuter multiplikatsiyasi” yo‘nalishida ham 3 ta baxtli abituriyentni ko‘rish mumkin. Ushbu yo‘nalishning rus guruhida 3 ta kvota (1 ta grant, 2 ta kontrakt) uchun 3 ta abituriyent hujjat topshirgan. Faqat ularning “kurashi” 1 ta grant o‘rniga bo‘ladi xolos. Kontrakt esa naqd.
Izoh (0)