2017-yilning 5-avgust kuni Issiqko‘l viloyati Qizil O‘ruk qishlog‘i yaqinida 3-avgust kuni yo‘l-transport hodisasi natijasida jarohatlangan O‘zbekistonning 6 nafar fuqarosi maxsus aviareysda o‘zbek vrachlari hamrohligida Qizg‘izistondan Toshkentdagi Respublika shoshilinch tibbiy yordam ilmiy markaziga keltirildi. Bu haqda Tashqi ishlar vazirligi matbuot xizmati xabar berdi.
Xabarda O‘zbekiston Respublikasi Tashqi ishlar vazirligi Qirg‘izistonning respublika va mahalliy hokimiyat organlari, tibbiyot muassasalari vakillariga O‘zbekiston fuqarolariga tibbiy yordam ko‘rsatilgani hamda Tomchi shahar aeroportiga O‘zbekiston samolyotini uchishi va qaytishi masalalari hal qilingani uchun minnatdorchilik bildirilgan.
2017-yilning 3-avgust kuni “Issiqko‘l-Bishkek” avtomobil yo‘lida yo‘l-transport hodisasi oqibatida 6 nafar jabrlangan O‘zbekiston Respublikasi fuqarolari Baliqchi shahridagi shifoxonaga joylashtirilgan edi.
O‘zbekiston Respublikasi Tashqi ishlar vazirligining bergan ma’lumotiga ko‘ra, qirg‘izistonlik shifokorlar tomonidan 2006-yilda tug‘ilgan Igor Orlov 3-avgust kuni operatsiya qilingan. Shuningdek, 4 nafar fuqaro ham o‘rta darajadagi tan jarohatlari olgan.
O‘zbekiston Respublikasi Prezidentining topshirig‘iga asosan Hukumat tomonidan tashkil etilgan Favqulodda vaziyatlar, Mudofaa, Tashqi ishlar va sog‘liqni saqlash vazirliklari xodimlaridan iborat bo‘lgan guruh, xususan, Favqulodda vaziyatlar vazirining birinchi o‘rinbosari K.Aripov va Sog‘liqni saqlash vaziri o‘rinbosari A.Xojiboyev boshchiligida O‘zbekiston Respublikasi Mudofaa vazirligi tasarrufidagi maxsus harbiy transport samolyotida 5-avgust kuni soat 03:10 da Toshkent shahridan uchib ketdi va soat 05:20 da Qirg‘iziston Respublikasining Tomchi shahriga kelib qo‘ngan.
O‘zbekiston Respublikasining Qirg‘izistondagi Elchixonasi tomonidan jabrlanganlarni samolyot bortiga yetkazish ishlari amalga oshirildi.
Soat 08:30 da maxsus harbiy transport samolyoti 6 nafar jabrlanganlar bilan Toshkent shahriga kelib qo‘ndi.
YTH natijasida jabrlanganlar Respublika shoshilinch tibbiy yordam ko‘rsatish markaziga joylashtirildi hamda ularga malakali shifokorlar tomonidan zaruriy muolajalar ko‘rsatilmoqda.
Sodir bo‘lgan yo‘l-transport hodisasi oqibatida quyidagi O‘zbekiston fuqarolari jarohat olgan:
1. Orlova Yelena Aleksandrovna, 1976-yilda tug‘ilgan;
2. Orlov Igor, 2006-yilda tug‘ilgan;
3. Orlova Veronika, 2006-yilda tug‘ilgan;
4. Li Yana Andreyevna, 2004-yilda tug‘ilgan;
5. Xan Janna Mixaylovna, 1969-yilda tug‘ilgan;
6. Obyedkova Lyudmila Aleksandrovna, 1952-yilda tug‘ilgan.
Izoh (0)