2017 йилнинг 5 август куни Иссиқкўл вилояти Қизил Ўрук қишлоғи яқинида 3 август куни йўл-транспорт ҳодисаси натижасида жароҳатланган Ўзбекистоннинг 6 нафар фуқароси махсус авиарейсда ўзбек врачлари ҳамроҳлигида Қизғизистондан Тошкентдаги Республика шошилинч тиббий ёрдам илмий марказига келтирилди. Бу ҳақда Ташқи ишлар вазирлиги матбуот хизмати хабар берди.
Хабарда Ўзбекистон Республикаси Ташқи ишлар вазирлиги Қирғизистоннинг республика ва маҳаллий ҳокимият органлари, тиббиёт муассасалари вакилларига Ўзбекистон фуқароларига тиббий ёрдам кўрсатилгани ҳамда Томчи шаҳар аэропортига Ўзбекистон самолётини учиши ва қайтиши масалалари ҳал қилингани учун миннатдорчилик билдирилган.
2017 йилнинг 3 август куни «Иссиқкўл-Бишкек» автомобиль йўлида йўл-транспорт ҳодисаси оқибатида 6 нафар жабрланган Ўзбекистон Республикаси фуқаролари Балиқчи шаҳридаги шифохонага жойлаштирилган эди.
Ўзбекистон Республикаси Ташқи ишлар вазирлигининг берган маълумотига кўра, қирғизистонлик шифокорлар томонидан 2006 йилда туғилган Игорь Орлов 3 август куни операция қилинган. Шунингдек, 4 нафар фуқаро ҳам ўрта даражадаги тан жароҳатлари олган.
Ўзбекистон Республикаси Президентининг топшириғига асосан Ҳукумат томонидан ташкил этилган Фавқулодда вазиятлар, Мудофаа, Ташқи ишлар ва соғлиқни сақлаш вазирликлари ходимларидан иборат бўлган гуруҳ, хусусан, Фавқулодда вазиятлар вазирининг биринчи ўринбосари К.Арипов ва Соғлиқни сақлаш вазири ўринбосари А.Хожибоев бошчилигида Ўзбекистон Республикаси Мудофаа вазирлиги тасарруфидаги махсус ҳарбий транспорт самолётида 5 август куни соат 03:10 да Тошкент шаҳридан учиб кетди ва соат 05:20 да Қирғизистон Республикасининг Томчи шаҳрига келиб қўнган.
Ўзбекистон Республикасининг Қирғизистондаги Элчихонаси томонидан жабрланганларни самолёт бортига етказиш ишлари амалга оширилди.
Соат 08:30 да махсус ҳарбий транспорт самолёти 6 нафар жабрланганлар билан Тошкент шаҳрига келиб қўнди.
ЙТҲ натижасида жабрланганлар Республика шошилинч тиббий ёрдам кўрсатиш марказига жойлаштирилди ҳамда уларга малакали шифокорлар томонидан зарурий муолажалар кўрсатилмоқда.
Содир бўлган йўл-транспорт ҳодисаси оқибатида қуйидаги Ўзбекистон фуқаролари жароҳат олган:
1. Орлова Елена Александровна, 1976 йилда туғилган;
2. Орлов Игорь, 2006 йилда туғилган;
3. Орлова Вероника, 2006 йилда туғилган;
4. Ли Яна Андреевна, 2004 йилда туғилган;
5. Хан Жанна Михайловна, 1969 йилда туғилган;
6. Обедкова Людмила Александровна, 1952 йилда туғилган.
Изоҳ (0)