4-avgust, juma kuni Fransiyaning Boval hayvonot bog‘ida katta panda egizaklarni dunyoga keltirdi, biroq ulardan biri vafot etdi. Bu haqda hayvonot bog‘i rahbariyatiga tayanib, “TASS” xabar bermoqda.
Birinchi panda juda nimjon tug‘ilgan va tug‘ruq paytida bo‘lgan xitoylik mutaxassislarning yordamiga qaramay, uning hayotini saqlab qolishning imkoni bo‘lmagan. Omon qolgan ikkinchi panda bolasining og‘irligi 142,4 grammga teng.
Bu Fransiyadagi yagona panda juftining ilk nasl qoldirishidir. Pandalar 2012-yilda Xitoydan 10 yilga ijaraga olingandi.
Yangi tug‘ilgan panda bolasini Fransiya prezidentining rafiqasi Brijit Makron o‘z qaramog‘iga oladi.
Associated Press agentligi ma’lumotiga ko‘ra, Xitoy hududidagi yovvoyi tabiatda 1,8 ming, tutqunlikda esa butun dunyo bo‘ylab 400 ga yaqin panda yashaydi.
Izoh (0)