4 август, жума куни Франциянинг Боваль ҳайвонот боғида катта панда эгизакларни дунёга келтирди, бироқ улардан бири вафот этди. Бу ҳақда ҳайвонот боғи раҳбариятига таяниб, «ТАСС» хабар бермоқда.
«Биз тунда туғилган пандалардан бирининг вафот этганини қайғу билан хабар қиламиз. Иккинчи панда боласи ўзини яхши ҳис этмоқда», — дейилади ҳайвонот боғи хабарида.
Биринчи панда жуда нимжон туғилган ва туғруқ пайтида бўлган хитойлик мутахассисларнинг ёрдамига қарамай, унинг ҳаётини сақлаб қолишнинг имкони бўлмаган. Омон қолган иккинчи панда боласининг оғирлиги 142,4 граммга тенг.
Бу Франциядаги ягона панда жуфтининг илк насл қолдиришидир. Пандалар 2012 йилда Хитойдан 10 йилга ижарага олинганди.
Янги туғилган панда боласини Франция президентининг рафиқаси Брижит Макрон ўз қарамоғига олади.
Associated Press агентлиги маълумотига кўра, Хитой ҳудудидаги ёввойи табиатда 1,8 минг, тутқунликда эса бутун дунё бўйлаб 400 га яқин панда яшайди.
Изоҳ (0)