O‘zbekistonda loyiha boshqaruvi tizimi joriy etiladi

Shavkat Mirziyoyev 24-iyul kuni “O‘zbеkiston Rеspublikasida loyiha boshqaruvi tizimini joriy etish chora-tadbirlari to‘g‘risida”gi farmonni imzoladi. Farmon matni O‘zA tomonidan taqdim etildi.

Hujjat loyiha boshqaruvining yagona axborot tizimini yaratish orqali davlat va hududiy dasturlar, investitsiya loyihalari amalga oshirilishini, moliyaviy mablag‘lar sarflanishini boshqarish mexanizmlarining samaradorligi va shaffofligini yanada oshirishni nazarda tutadi.

Unga ko‘ra, 2017–2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilangan vazifalar ijrosini ta’minlash maqsadida Loyiha boshqaruvining yagona milliy axborot tizimini joriy etish bo‘yicha muvofiqlashtiruvchi kengash tashkil etiladi. U:

har bir resursning (tovarlar, ishlar va xizmatlarning) haqiqiy bozor qiymatini shakllantirish hamda noto‘g‘ri texnik topshiriq va smetalarni yuritishga yo‘l qo‘ymaslik imkonini beradigan resurslar yagona milliy ma’lumotnomasini joriy etishni;

uch o‘lchamli loyihalash texnologiyasidan foydalangan holda resurslar hisobini yuritish, loyiha bo‘yicha qabul qilingan qaror samaradorligini baholash, resurslar miqdori va turlari to‘g‘ri belgilanganligini aniqlashni;

loyihaoldi, loyiha hujjatlarini ishlab chiqish va tegishli jarayonlardan o‘tkazish, ijro intizomiga rioya etish, ish yurituvi, hisobotlar tuzish ustidan elektron nazorat o‘rnatishni;

davlat xaridlarining shaffofligini va suiiste’molchiliklarning oldini olishni ta’minlaydigan yagona avtomatlashtirilgan tizim tashkil etishni;

ishlar bajarilishi va dasturlar ijrosining haqiqiy holatini aks ettiruvchi kalendar-tarmoq rejalashtirishni joriy etishni, shuningdek xabardor qilish tizimiga ega reja va jadvallarni shakllantirishni;

boshqaruv qarorlari qabul qilishning nazorat-tahliliy ta’minotini nazarda tutadi.

Hujjat O‘zbekiston Prezidenti huzuridagi Loyiha boshqaruvi milliy agentligi tashkil etilishini nazarda tutadi.

Farmon ijrosini nazorat qilish O‘zbekiston bosh vaziri A.N. Aripov va bosh prokuror I.B. Abdullayev zimmasiga yuklandi.