Toshkent viloyati IIB tomonidan ma’lum qilinishicha, joriy yilning 1-iyulida uch nafar niqobli shaxs O‘rta Chirchiq tumanida yashovchi ayolning avtomobilini kuch ishlatib, olib qochgan.
Xabar berilishicha, 1-iyul soat 07:30 da O‘rta Chirchiq tumanida yashovchi uy bekasi, 1971-yilda tug‘ilgan S. M. uyidan chiqib, Toshkent shahar Bektemir tumani hududida joylashgan “Qo‘yliq dehqon bozori”ga qarab o‘ziga tegishli Lacetti Gentra rusumli mashinada yo‘lga chiqqan. Uyidan taxminan 100 metr uzoqlikda yo‘lning o‘rtasida shlakablok g‘ishti turganligini ko‘rib, avtoulovini to‘xtatgan.
Avtomobildan tushib, shlakablok g‘ishtini yo‘lning chekkasiga olib, avtouloviga o‘tirayotgan vaqtida yuziga oq rangli dokadan tibbiy niqob bog‘langan uch nafar noma’lum shaxs, S.M.ni qo‘lidan tortib avtoulovidan tushirgan. Qo‘llari bilan uni do‘pposlab, avtomobil hamda uning ichida bo‘lgan 6 million 550 ming so‘m, 250 AQSh dollari, bir dona Samsung J1 rusumli, bir dona Nokia rusumli uyali aloqa telefonlari hamda bir dona ayollar tilla ziragini olib qochib, voqea joyidan yashiringan.
Olib borilgan tezkor chora-tadbirlar natijasida S.M.ga tegishli avtomobil Toshkent shahar Bektemir tumani Yuqori Chirchiq ko‘chasida joylashgan “Metalqurilmalari servis” MCHJ yaqinida yo‘l chetidan soz holda topildi. Gumondorlar Sh.A., B.Sh. va T.X. qo‘lga olindi.
Hozirgi vaqtda ushbu shaxslarga nisbatan O‘zbekiston Respublikasi Jinoyat Kodeksining tegishli moddalariga asosan jinoyat ishi qo‘zg‘atilib, tergov harakatlari olib borilmoqda.
Izoh (0)