Тошкент вилояти ИИБ томонидан маълум қилинишича, жорий йилнинг 1 июлида уч нафар ниқобли шахс Ўрта Чирчиқ туманида яшовчи аёлнинг автомобилини куч ишлатиб, олиб қочган.
Хабар берилишича, 1 июль соат 07:30 да Ўрта Чирчиқ туманида яшовчи уй бекаси, 1971 йилда туғилган С. М. уйидан чиқиб, Тошкент шаҳар Бектемир тумани ҳудудида жойлашган «Қўйлиқ деҳқон бозори»га қараб ўзига тегишли Lacetti Gentra русумли машинада йўлга чиққан. Уйидан тахминан 100 метр узоқликда йўлнинг ўртасида шлакаблок ғишти турганлигини кўриб, автоуловини тўхтатган.
Автомобильдан тушиб, шлакаблок ғиштини йўлнинг чеккасига олиб, автоуловига ўтираётган вақтида юзига оқ рангли докадан тиббий ниқоб боғланган уч нафар номаълум шахс, С.М.ни қўлидан тортиб автоуловидан туширган. Қўллари билан уни дўппослаб, автомобиль ҳамда унинг ичида бўлган 6 миллион 550 минг сўм, 250 АҚШ доллари, бир дона Samsung J1 русумли, бир дона Nokia русумли уяли алоқа телефонлари ҳамда бир дона аёллар тилла зирагини олиб қочиб, воқеа жойидан яширинган.
Олиб борилган тезкор чора-тадбирлар натижасида С.М.га тегишли автомобиль Тошкент шаҳар Бектемир тумани Юқори Чирчиқ кўчасида жойлашган «Металқурилмалари сервис» МЧЖ яқинида йўл четидан соз ҳолда топилди. Гумондорлар Ш.А., Б.Ш. ва Т.Х. қўлга олинди.
Ҳозирги вақтда ушбу шахсларга нисбатан Ўзбекистон Республикаси Жиноят Кодексининг тегишли моддаларига асосан жиноят иши қўзғатилиб, тергов ҳаракатлари олиб борилмоқда.
Изоҳ (0)