Andijon viloyatida faoliyat ko‘rsatayotgan 622 ta qassobxonaning barchasida bir kilogramm go‘sht 29 ming so‘mdan sotiladigan bo‘ldi. Bu haqda “Andijonnoma” nashriga tayangan holda Uz24 xabar berdi.
Qayd etilishicha, viloyat hokimi Shuhratbek Abdurahmonov “Bog‘i Bobur” dam olish maskanida sohaga aloqador tashkilotlar rahbarlari, shahar va tuman hokimlari, prokuratura, ichki ishlar, soliq idoralarining xodimlari va qassoblar bilan uchrashuv o‘tkazgan. Unda go‘sht va go‘sht mahsulotlarining narxi asossiz ko‘tarilayotganligi muhokama qilingan. Ayni kunlarda viloyat hududida bir kilogramm go‘shtning narxi 34 ming so‘mga ko‘tarilganligi aytilgan. Asossiz ravishda narx belgilash aholi noroziligiga sabab bo‘layotganligiga e’tibor qaratilgan, vaziyatni barqarorlashtirish yuzasidan mutasaddilar chora ko‘rmayotganligi tanqid ostiga olingan.
“Jarayonni tahlil qilish maqsadida nazorat tadbiri o‘tkazildi. Unga ko‘ra, bir kilogramm go‘shtning eng maqbul narxi aniqlandi. Muhokamalar yakunida viloyatda faoliyat ko‘rsatayotgan 622 ta qassobxonaning barchasida bir kilogramm go‘sht 29 ming so‘mdan sotiladigan bo‘ldi”, deyiladi nashr xabarida.
Izoh (0)