Joriy yilning 6 oyida respublika avtomobil yo‘llarida sodir etilgan yo‘l-transport hodisalari soni 2016-yilning shu davriga nisbatan 77 taga, ushbu hodisalarda dunyodan ko‘z yumganlar 21 nafarga, tan jarohati olganlar 83 nafarga kamaydi. Bu haqda IIV YHXBB boshlig‘i, polkovnik Xolmatjon Saydaliyev O‘zbekiston IIV saytida joylashtirilgan maqolasida ma’lum qildi.
Toshkent shahridagi 115 ta chorrahaga videokuzatuv moslamalari o‘rnatilgan edi. Yangi tizim shu yilning 15-mart kunidan e’tiboran ishga tushirildi. Har bir chorraha harakatni nazorat qiluvchi, qoidabuzarliklarni avtomatik tarzda aniqlovchi zamonaviy texnik vositalar, intellektual detektorlar, kontrollerlar, videokameralar bilan jihozlandi.
Chorrahalardagi vaziyatni masofadan uzluksiz kuzatib borish uchun videokameralar hamda fuqarolar uchun maxsus xizmatlarni, jumladan, ichki ishlar, tez tibbiy yordam, yong‘in xavfsizligi xizmatlarini chaqirish uchun maxsus vositalar o‘rnatildi.
Masalaning ana shu muhim tomonlari inobatga olingan holda, mazkur tizimni respublikamizning barcha hududlarida joriy etish lozimligi O‘zbekiston Prezidentining 2017-yil 11-iyuldagi “Yo‘l harakati xavfsizligini ta’minlash tizimini yanada takomillashtirish chora-tadbirlari to‘g‘risida”gi qarori bilan belgilab berildi.
Qarorda, shuningdek, yo‘llarni saqlash va ularning yo‘l belgilari, axborot ko‘rsatkichlari, yo‘l harakatini tartibga solishning boshqa texnik vositalari bilan jihozlash bo‘yicha o‘rnatilgan talablarga so‘zsiz rioya etilishini ta’minlashga ham alohida e’tibor qaratilgan. Belgilarning aniq va ko‘rinarli tarzda joylashishi, ularni nur qaytaruvchi maxsus qoplamalardan foydalanilgan holda tayyorlanishi harakatlanish xavfsizligini ta’minlash samaradorligini oshirib, yo‘l-transport hodisalarining oldini olishga xizmat qiladi.
Qaror bilan Ichki ishlar vazirligi va Avtomobil yo‘llari davlat qo‘mitasining Uzavtoyo‘lbelgi davlat unitar korxonasini tashkil etish hamda tegishli normativ hujjatlar talablariga muvofiq yo‘l belgilari, axborot ko‘rsatkichlari, yo‘l harakatini tartibga solishning boshqa texnik vositalarini ishlab chiqarishni uning asosiy vazifasi etib belgilash haqidagi taklifi ma’qullandi.
Yaratilayotgan qulayliklardan yana biri ko‘pchilik harakat ishtirokchilarining taklif-istaklari asosida joriy yil 1-sentabrdan e’tiboran avtotransport vositalari uchun xaridorgir harf va raqamlar kombinatsiyasiga ega bo‘lgan davlat ro‘yxat raqamlarini oshirilgan to‘lov stavkalari bo‘yicha, shu jumladan, kimoshdi savdosini o‘tkazish yo‘li bilan tanlash tartibining joriy etilishi bo‘ldi.
2018- yil 1- yanvardan e’tiboran avtotransport vositasidan foydalanish va (yoki) uni tasarruf etish huquqi uchun ishonchnomalarni, avtotransport vositasi ijarasi, tekin foydalanish, garov, lizing shartnomalarini fuqarolar tomonidan ichki ishlar organlarining tegishli yo‘l harakati xavfsizligi bo‘linmalarida hisobga quyish to‘g‘risidagi talabga ham o‘zgartirish kiritildi. Endilikda bu ish notariuslar tomonidan ularning elektron shaklini DYHXXga jo‘natish orqali amalga oshiriladi.
2018-yil 1-yanvardan e’tiboran yo‘l harakati xavfsizligi bo‘linmalarining jismoniy shaxslarga tegishli yengil avtotransport vositalarini (yuk, yo‘lovchi va maxsus transport vositalari bundan mustasno) majburiy texnik ko‘rikdan o‘tkazish bo‘yicha funksiyalarini yuridik shaxslar — tadbirkorlik subyektlariga bosqichma-bosqich o‘tkaziladi.
Prezident qaroriga asosan Toshkent shahrida, Samarqand va Xorazm viloyatlarida tajriba tariqasida yo‘l-patrul xizmati mototsikldagi guruhlari tuziladi. Ularga yo‘llar va ko‘chalarning harakatlanish qiyin bo‘lgan qatnov qismlarida, odamlar gavjum joylarda, shuningdek, xorijiy va boshqa delegatsiyalarni kuzatishda yo‘l harakati xavfsizligini ta’minlash vazifalari yuklatiladi.
Izoh (0)