Chashmai Ayub maqbarasidan o‘g‘rilab ketilgan peshlavha Britaniyadan O‘zbekistonga qaytariladi

Britaniya muzeyi Buxoro viloyatining Vobkent tumanida joylashgan Chashmai Ayub maqbarasi old qismidan o‘g‘rilab ketilgan parchani O‘zbekistonga qaytarishga yordamlashdi. Bu haqda The Guardian ma’lum qildi, deya xabar beradi “Gazeta.uz”.

Balandligi yarim metrdan ziyod bo‘lgan arab tilidagi kalligrafik yozuvga ega lavha 2014-yilda o‘g‘rilab ketilgan va shundan beri o‘rni bo‘sh turgandi.

Ushbu parcha Londonning Mayfair galereyasida sotuvga qo‘yilmaguncha butunlay yo‘qotilgan, deb hisoblab kelinayotgan edi. Yaqinda O‘zbekistonga tashrif buyurgan Oksford olimi peshlavha tasvirini Saymon Rey galereyasi katalogida ko‘rib qoladi.

Ushbu artefaktni sotib olgan Rey Britaniya muzeyi bilan bog‘lanadi. Reyning so‘zlariga ko‘ra, uni peshlavha yillar davomida Germaniyadagi kolleksiyalardan birida saqlab kelingan, deya ishontirishgan.

Londonda shu haftada artefaktni O‘zbekiston elchixonasiga topshirish marosimi bo‘lib o‘tishi kutilmoqda.

The Guardian nashrining yozishicha, O‘zbekiston bosh vaziri Abdulla Aripov noyob topilmani qaytarishdagi jonbozlik uchun o‘z minnatdorchiligini bildirdi.