Navoiy viloyat bojxona boshqarmasi xodimlari bevosita dehqon xo‘jaliklarining qishloq xo‘jaligi mahsulotlari yetishtirilayotgan dalalar, poliz va bog‘lariga tashrif buyurmoqda. Bu haqda “Daryo”ga boshqarma axborot xizmati ma’lum qildi.
Xatirchi tumanida istiqomat qiluvchi Ilhom Shermatov o‘z xonadonida 15 yildan beri limon, uzum, olma va boshqa mevalarni yetishtirib kelmoqda. Bojxonachilar uning xonadonida bo‘lib, mamlakatda eksportni rivojlantirish va rag‘batlantirish borasida amalga oshirilayotgan keng ko‘lamli ishlar, eksportni qo‘llab-quvvatlash maqsadida beriladigan imtiyozlar haqida batafsil tushuntirish berdi.
Bojxona rasmiylashtiruvi uchun lozim bo‘ladigan hujjatlar to‘g‘risida ma’lumotlar taqdim etildi. Endilikda u kabi dehqon va bog‘bonlarga o‘z mahsulotlarini chetga olib chiqish yanada osonlashgani tushuntirildi. Ilhom Shermatov bu yilgi hosilini endi o‘zi mustaqil ravishda eksport qilmoqchiligini ma’lum qildi.
O‘zbekiston Respublikasi Prezidentining “Mahalliy eksport qiluvchi tashkilotlarni yanada qo‘llab-quvvatlash va tashqi iqtisodiy faoliyatni takomillashtirish chora-tadbirlari to‘g‘risida”gi qaroriga ko‘ra,2017-yilning 1- iyulidan boshlab barcha tadbirkorlik subyektlariga yangi meva-sabzavot mahsulotlari, uzum va poliz mahsulotlarini to‘lovni oldindan 100 foiz amalga oshirish sharti bilan to‘g‘ridan-to‘g‘ri shartnomalar asosida eksport qilish huquqi berildi.
Eksport tovarlarining bojxona rasmiylashtiruvi bojxona organiga barcha hujjatlar taqdim etilgan kundan e’tiboran 3 ish kuni ichida amalga oshirilishi belgilangan. Hozirda eksportga mo‘ljallangan qishloq ho‘jaligi mahsulotlari sifati buzilishini oldini olish va xaridorga tezlik bilan yetkazib berishga ko‘maklashish maqsadida Navoiy viloyati bojxona postlari tomonidan ushbu amaliyot bojxona organiga barcha hujjatlar taqdim etilgandan so‘ng 3 soat ichida amalga oshirilmoqda.
Izoh (0)