Sharqiy Antarktidada Larsen muzligining bir parchasi sinib tushgani — oddiy hodisa. Bo‘lak — kattaligi, muzlik esa — faolligi jihatidan rekord darajada emas. Bunday fikrni Rossiya gidrometeorologiya markazining Arktika va Antarktida ilmiy-tadqiqot instituti Antarktida ekspeditsiyasi boshlig‘i o‘rinbosari Vyacheslav Martyanov bildirdi, deb yozadi “TASS”.
“Oddiy hodisa — muzlikning bir bo‘lagi sinib tushishini shov-shuvga aylantirmoqchi bo‘lishganini ko‘rib, hamkasblarim bilan rosa kulishdik”, — dedi u.
Avvalroq Suonsi universiteti olimlari 12-iyul, chorshanba kuni Antarktidadan ulkan aysberg sinib tushgani, u bir necha o‘n yillar “umr kechirishi” mumkinligi ma’lum qilgan edi.
Olimlar fikricha, u Antarktidadagi barcha shelfli muzliklarni birlashtirib turgan, endi esa ular qit’adan ajralib chiqishni boshlashi mumkin.
Martyanov aniqlik kiritishicha, shelfli muzlik yerga tayanmaydi, balki suv ustida qalqib turadi. Antarktikada qor ko‘p yog‘adi, u qalinlashadi va zichlashib, muzga aylanadi va ertami, kechmi shelfli muzlikning parchalari sinib tushib, dengizga oqib ketadi.
“Ajralib tushayotgan bo‘lakning maydoni 5 kvadrat kilometrga yaqin, Antarktidada sinib tushgan eng katta bo‘lak esa 40 kvadrat kilometrga yetgan va u Ginnesning Rekordlar kitobiga kiritilgan”, — dedi u.
Uning so‘zlariga ko‘ra, Arktika va Antarktida institutida doimiy ravishda Antarktida muz qatlami monitoring qilib boriladi, va Larsen muzligi — ko‘plab shelfli muzliklar orasida eng faoli emas. “Bu shov-shuv — asossiz narsa”, — deb hisoblaydi ekspert.
Izoh (0)