Olimlar hisob-kitoblariga ko‘ra, iqlim o‘zgarishi natijasida dengiz sathining oshishi Amerikaning yuzlab shaharlari yaqin 20—80 yil ichida suv ostida qolishiga olib kelishi mumkin, deb yozadi Forum Daily. Risk ro‘yxatidan Nyu-York, Boston, San-Fransisko va Mayami kabi megapolislar o‘rin olgan.
Bu haqda The Union of Concerned Scientists tashkiloti tadqiqotida aytiladi. Suv ostida qolish deganda “shaharning asosiy qismi yiliga kamida 26 marta toshqin ostida qolishi yoki haftasiga bir martaga teng toshqinga uchrashi” nazarda tutilgan.
Tadqiqotchilar hisoblab chiqishicha, dengiz sathi ko‘tarilishi sur’atlaridan kelib chiqib, yaqin 15—20 yil ichida Amerikaning 165—180 ta shahri, 40 yil ichida — 360 ga yaqin shahri, 2100-yilga kelib — 490—670 ta shahri surunkali suv toshqini ostida qoladi.
2035-yilgacha suv ostida qoladigan shaharlar asosan Jersi qirg‘oqlari bo‘ylab hamda Shimoliy Karolina va Janubiy Luiziananing ba’zi hududlarida joylashgan.
2060-yilga kelib, ushbu ro‘yxat Texas, Florida, Janubiy Karolina, Merilend, Nyu-Jersi shtatlaridagi kichik va katta shaharlar bilan kengayadi.
Ammo olimlar vaziyatdan chiqib ketish yo‘li borligini aytmoqda. Ularning ma’lumotlariga ko‘ra, asr oxirigacha global isish Selsiy bo‘yicha 1,5 darajaga — 2 darajagacha sekinlashtirilsa, suv toshqinidan AQShdagi 200—380 ta sohilbo‘yi aholi punktini qutqarib qolish mumkin bo‘ladi.
Izoh (0)