Олимлар ҳисоб-китобларига кўра, иқлим ўзгариши натижасида денгиз сатҳининг ошиши Американинг юзлаб шаҳарлари яқин 20—80 йил ичида сув остида қолишига олиб келиши мумкин, деб ёзади Forum Daily. Риск рўйхатидан Нью-Йорк, Бостон, Сан-Франциско ва Майами каби мегаполислар ўрин олган.
Бу ҳақда The Union of Concerned Scientists ташкилоти тадқиқотида айтилади. Сув остида қолиш деганда «шаҳарнинг асосий қисми йилига камида 26 марта тошқин остида қолиши ёки ҳафтасига бир мартага тенг тошқинга учраши» назарда тутилган.
Тадқиқотчилар ҳисоблаб чиқишича, денгиз сатҳи кўтарилиши суръатларидан келиб чиқиб, яқин 15—20 йил ичида Американинг 165—180 та шаҳри, 40 йил ичида — 360 га яқин шаҳри, 2100 йилга келиб — 490—670 та шаҳри сурункали сув тошқини остида қолади.
2035 йилгача сув остида қоладиган шаҳарлар асосан Жерси қирғоқлари бўйлаб ҳамда Шимолий Каролина ва Жанубий Луизиананинг баъзи ҳудудларида жойлашган.
2060 йилга келиб, ушбу рўйхат Техас, Флорида, Жанубий Каролина, Мэриленд, Нью-Жерси штатларидаги кичик ва катта шаҳарлар билан кенгаяди.
Аммо олимлар вазиятдан чиқиб кетиш йўли борлигини айтмоқда. Уларнинг маълумотларига кўра, аср охиригача глобал исиш Цельсий бўйича 1,5 даражага — 2 даражагача секинлаштирилса, сув тошқинидан АҚШдаги 200—380 та соҳилбўйи аҳоли пунктини қутқариб қолиш мумкин бўлади.
Изоҳ (0)