Xalqaro press-klubning 3-iyulda bo‘lib o‘tgan yig‘ilishida ishtirok etgan Book Café rahbari Laziz Adhamov bugungi kunda o‘zbek yoshlarining kitob o‘qishga, ta’lim olishga nisbatan munosabati yuzasidan fikr bildirdi. Uning ta’kidlashicha, bugungi kundagi yoshlar xorijlik tengdoshlari bilan raqobat qilishga tayyorlanishi kerak, ulardek kitob o‘qishi va dars qilishi kerak.
Yaponiyada bo‘lganimda har bir metro bekatining chiqish joyida kitob do‘koni borligini ko‘rganman. Har bir yapon kitob o‘qiydi. Kechalari yapon yoshlari kafelarda dars qiladi.O‘zbekistonga qaytgach, balki bizning yoshlarda shunday imkoniyat yo‘qdir, deb o‘ylab qoldim. Shundan so‘ng Book Café’ni ochishga qaror qildim. Book Café’da o‘tirish bepul bo‘lgani uchun, asosan, ingliz tilini o‘rganuvchi yoshlar va xorijlik talabalar keladi. Shunday bo‘lsa ham, yoshlar kitob o‘qimayapti.
O‘g‘lim 15 yoshga to‘ldi. Undan nima uchun tarixni yoki boshqa fanlarni o‘qimasligini so‘rasam, “Google bor-ku, hamma narsani undan topsa bo‘ladi-ku”, deydi.
Bir safar ta’til vaqtida o‘g‘lim bilan Singapurga bordim. U yerda ham yoshlar doimo kitob o‘qiydi, dars qiladi. O‘g‘limga aytdim: “Zamon o‘zgaryapti, biznes uchun besh yildan keyin chegara bo‘lmaydi. Sening raqobatchilaring ana shu Singapurda dars qilib o‘tiribdi.
Agar sen tikuvchi bo‘lmoqchi bo‘lsang, Bangladeshda tikuvchilar 200 dollar oladi. Sen ham 200 dollar olasan. Hindiston yoki Pokistonda odamlar 300—400 dollar olib ishlayapti, sen 300 dollarga ishlasang, ularga raqobatchi bo‘lasan.
Agar sen muhandis bo‘lsang va besh ming dollar olsang, Singapurda 10 ming dollar olayotgan bolaga raqobatchi bo‘lasan”.
Ana shu gaplarni aytgan holda, o‘g‘limga uning raqobatchilari Singapurdagi, Janubiy Koreyadagi bolalar ekanligini, Toshkentdagi bekorchi yuradigan sinfdoshlari emasligini aytdim.
Laziz Adhamov, Book Cafe rahbari
Izoh (0)