Халқаро пресс-клубнинг 3 июлда бўлиб ўтган йиғилишида иштирок этган Book Café раҳбари Лазиз Адҳамов бугунги кунда ўзбек ёшларининг китоб ўқишга, таълим олишга нисбатан муносабати юзасидан фикр билдирди. Унинг таъкидлашича, бугунги кундаги ёшлар хорижлик тенгдошлари билан рақобат қилишга тайёрланиши керак, улардек китоб ўқиши ва дарс қилиши керак.
Японияда бўлганимда ҳар бир метро бекатининг чиқиш жойида китоб дўкони борлигини кўрганман. Ҳар бир япон китоб ўқийди. Кечалари япон ёшлари кафеларда дарс қилади.Ўзбекистонга қайтгач, балки бизнинг ёшларда шундай имконият йўқдир, деб ўйлаб қолдим. Шундан сўнг Book Café’ни очишга қарор қилдим. Book Café’да ўтириш бепул бўлгани учун, асосан, инглиз тилини ўрганувчи ёшлар ва хорижлик талабалар келади. Шундай бўлса ҳам, ёшлар китоб ўқимаяпти.
Ўғлим 15 ёшга тўлди. Ундан нима учун тарихни ёки бошқа фанларни ўқимаслигини сўрасам, «Google бор-ку, ҳамма нарсани ундан топса бўлади-ку», дейди.
Бир сафар таътил вақтида ўғлим билан Сингапурга бордим. У ерда ҳам ёшлар доимо китоб ўқийди, дарс қилади. Ўғлимга айтдим: «Замон ўзгаряпти, бизнес учун беш йилдан кейин чегара бўлмайди. Сенинг рақобатчиларинг ана шу Сингапурда дарс қилиб ўтирибди.
Агар сен тикувчи бўлмоқчи бўлсанг, Бангладешда тикувчилар 200 доллар олади. Сен ҳам 200 доллар оласан. Ҳиндистон ёки Покистонда одамлар 300—400 доллар олиб ишлаяпти, сен 300 долларга ишласанг, уларга рақобатчи бўласан.
Агар сен муҳандис бўлсанг ва беш минг доллар олсанг, Сингапурда 10 минг доллар олаётган болага рақобатчи бўласан».
Ана шу гапларни айтган ҳолда, ўғлимга унинг рақобатчилари Сингапурдаги, Жанубий Кореядаги болалар эканлигини, Тошкентдаги бекорчи юрадиган синфдошлари эмаслигини айтдим.
Лазиз Адҳамов, Book Cafe раҳбари
Изоҳ (0)