Buyuk Britaniyaning Morey grafligidan bo‘lgan sobiq o‘rmonchi va yog‘och kesish zavodining egasi 75 yoshli Richard Ogilvi Ikkinchi jahon urushi davridan qolgan kemani suvga tushiraman deb, omadsizlikka uchradi. Besh yil davomida ta’mirlangan yaxta, besh daqiqada cho‘kib ketdi. Bu haqda Metro’ga tayanib, TJournal xabar berdi.
Ogilvi eski Sea Wraithe kemasini 2007-yilda Shimoliy dengizga yo‘l olish orzusida sotib olgan, biroq uni ta’mirlashga bir necha yildan keyin kirishgan. 12 metrli yaxtani ta’mirlashga u kuniga sakkiz soat vaqtini sarflagan.
Ogilvi yaxta tayyor ekanligini sinash maqsadida kemani Shimoliy dengizning bo‘g‘ozlaridan biriga tushirgan. Biroq uni omadsizlik kutmoqda edi: besh daqiqadan so‘ng kema suv ostiga cho‘kib ketdi.
Ushbu hodisadan so‘ng Ogilvining ikki nafar o‘g‘li kemani quruqlikka olib chiqishda yordam berdi. Hozirda kema sohilga bog‘lab qo‘yilgan. Yaxta egasi mashinada uxlab, suv chekinishini kutmoqda. Shundagina u kema bortidagi suvni chiqarib tashlaydi.
Ogilvi yaxtaning restavratsiyasi uchun bor kuchi va mablag‘ini sarflaganini tan oldi. Bundan tashqari u ushbu kema uchun qancha pul sarflaganini xotini bilib qolishidan qo‘rqmoqda.
Omadsizlikka qaramay, Ogilvi bu voqeani “yaxshi tajriba” deya atadi. Biroq uning rafiqasi Syu erining ishini “butun oilani sharmanda qilish“, deya baholamoqda.
Izoh (0)